(sursilvan) La jamna vargada hai jeu giu visetas nunspitgadas. Jeu vevel planisau il gi tut auter e vess giu detgavunda da far. Basta, vonzei ha ei scalinau vid igl esch-casa, ed jeu hai aviert. La viseta ha gnanc fatg liungas ed ei immediat stada da casa en. Ella vess silmeins astgau dumandar, sche jeu hagi peda e sch’ella astgi entrar. Mo che gliez ei buc siu dafar, hai jeu lu stuiu constatar pér pli tard.
Cun quei hosp in tec mulestus en casa sun jeu tonaton sespruaus dad esser en buna tradiziun biblica hospiteivels: «Astgel jeu far amogna in caffè?» – «Na, pli bugen in te, in da jarvas.» – «Secapescha!» Ordad in te eis ei lu vegniu dus e treis ed aschia vinavon. Mes plans parevan lavagai ed il gi ton sco piars. Tut quei che jeu level pigliar amauns, ei quei mument stau eri e restau pentent.
Cun quei hosp in tec mulestus en casa sun jeu tonaton sespruaus dad esser en buna tradiziun biblica hospiteivels.
Mo la viseta ha sin ina moda era purtau in cert flad. Ils quitaus dalla lavur e dallas differentas pendenzas ein nuota pli stai aschi presents. Era auters quitaus dil mintgagi ein stai sco naven. Aber che quella viseta stetti lu bunamein in’entira jamna, gliez vess jeu maina sminau. L’entschatta sun jeu cheutras staus occupaus cumpletamein, pér suenter dus treis gis sun jeu lu era puspei vegnius da far auter.
Gie, aschia eis ei stau cun quella viseta nunspitgada. Il num dad ella enconuschel jeu buc, denton para ei dad esser stau in infect che ha caschunau febra e schau anavos mei cun ina tuos. Sco biars auters sun jeu pia staus malsauns. Bugen ni nuidis hai jeu giu da prender peda per quei hosp ed hai aschia era giu caschun da far inaga auters patratgs. Quei po esser il positiv vid quella viseta.
E sche jeu patratgel vid autras specias da malsognas, sche eis ei gnanc adina sempel da prender il positiv. Als ins gartegia ei dad anflar forza era sche tut ei stgir. E mintgaton ston ins esser leds da saver sepusar vid enzatgi, cu ins po buc pli, da saver surschar il grev e pesont al Segner.