L’illustratura engiadinaisa Pia Valär lavura dapi otg onns sco independenta en ses atelier a Turitg. Actualmain è ella handicapada tras il stuair purtar in chalzer aut vid il pe sanester suenter avair stgarpà gista duas giadas la tarschola d’Achilles.
Jau sun ina persuna che ama e dovra il moviment. En mia situaziun hai jau gì d’emprender da far tut pli plaun e da ma laschar gidar.
Il barat cun il rispli ed in fegl alv è il mintgadi da la dunna da 43 onns. Fin che l’illustraziun empustada è pronta sin palpiri dovri bler temp, persistenza ed inschign. Il temp da lavur possia ella partir en sez, tut tenor las empustaziuns da la clientella.
Da turnar ina giada en sia patria, l’Engiadina, na saja nagina opziun. Il ravugl dad amias ed amis ch’ella haja a Turitg saja memia custaivel per bandunar la citad. Ultra da quai ha ses marus emprendì aifer in mez onn a discurrer rumantsch. Quai è dapi stgars sis onns er lur lingua da relaziun.
Avant che Pia Valär ha fatg la scola d’art en Scozia, ha ella emprendì magistra ed è er stada a l’ester a lavurar. Tranter auter er a Catania, nua ch’ella ha fatg enconuschientscha cun la mafia.
In’ura – in giast. In inscunter cun ina persuna interessanta che raquinta da sia vita, da sias activitads ed experientschas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
