Artistas ed artists da l'entir mund han gia fatg inscenaziuns en la tur cotschna sin il pass dal Güglia. Il temp da l'edifizi sin il Güglia va a fin l'avust 2023. Lura ston ils organisaturs chattar in nov lieu per lur gieus, e l'edifizi vegn stgarpà giu.
La tur è vegnida construida il 2017, atgnamain vess ella gia stuì vegnir stgarpada giu il 2020, il chantun ha dentant prolungà la lubientscha per la tur. Ed uschia è ella restada 6 onns in'attracziun sin il pass dal Güglia. La tur cotschna svanescha per adina, Origin discurra dentant gia d'ina nova tur, questa giada dentant ina permanenta.
Program 2023
Per l'onn 2023 han ils organisaturs dal festival d'Origen tschernì il tema «temp». Uschia sa basa il ballet «TIME» sin il roman «Momo» da Michael Ende. La coreografa Yuka Oishi è engaschada per realisar quest toc.
En il concert e ballet «SEVEN AGES» sa fatschenta il cumponist Kirill Richter cun la metafra da la vita da Shakespeare en ses drama «As you like it». Richter ha intunà quella e Marco Goecke ha fatg latiers ina choreografia. Plinavant datti concerts dal Ensemble Vocal Origen da Clau Scherrer. Els chantan tranter auter «Lux Aeterna» da György Ligeti.
Spazzada
-
Bild 1 von 7Legenda: RTR
-
Bild 2 von 7Legenda: RTR
-
Bild 3 von 7Legenda: RTR
-
Bild 4 von 7Legenda: RTR
-
Bild 5 von 7Legenda: RTR
-
Bild 6 von 7Legenda: RTR
-
Bild 7 von 7Legenda: Anc trais dis avant la spazzada ha quai naivì sin il Pass dal Güglia. Origen, Benjamin Hofer
Ils 26 da settember 2023 è vegnida spazzada la tur. Suenter 6 onns en funcziun ha ella gì radund 300 occurenzas cun plirs millis visistaders. Cunzunt loschs èn ils organisaturs, ch'els han pudì festivar 30 premieras per tocs da musica u era ballett en la tur cotschna.
La tur da 29 meters autezza cuntegna 690 meters cubic laina, 18'000 darschuns (Dübel) e 24'400 struvas. Era èn vegnidas integradas 11 tonnas atschal. Suenter avair allontanà la tecnica, l'atschal ed il material ch'els han anc pudì duvrar, è vegnida spazzada la tur. La laina na pudessian ins betg pli duvrar per construcziuns, quella è vegnida isada da l'aura. Plinavant cuntegna ella anc bleras struvas e colur. Perquai vegn la laina mazzacrada e brischada. Uschia po vegnir duvrada l'energia dal brischament.
La construcziun aveva cuzzà be dus mais. Custà ha la tur totalmain 3,5 milliuns francs. Ils singuls elements da laina eran vegnids preproducids e transportads cun in transport spezial tras las giassas per part fitg stretgas dal Pass dal Güglia siadora.