Anc vai insaquants mais enfin ch’ils camiuns e bus da turnea e cun els artistas ed artists sa ferman enta Degen. Suenter dus onns pausa sfurzada è il plaschair dentant grond tar tuts involvids. Sco il 2020 è il festival puspè vendì ora – quai era per il motiv ch’ils bigliets dal 2020 èn quest onn anc ina giada valaivels. Bunamain tuttina sco il 2020 è era il Line Up, i dat be duas excepziuns en il program. Ina midada è ch’il musicist tudestg «Kummer» vegn remplazzà cun la band «Giant Rooks». Pli interessanta è però la secunda midada en il program.
Derniera da las Liricas Analas
Ils rappers rumantschs pendan anc vitiers in ultim concert. Betg ils concerts a Turitg ubain a Cuira èn l'adia per propi, mabain in’ultima runda enta Degen serra il chapitel da la band. La gievgia saira – la saira svizra – ha ses punct culminant cun il concert da las Liricas Analas. Avant tutga la tribuna als Newcomers «The Oskars» (SG), «Crispy Dee» (TG) e «We Are Ava» (SG) che surdattan suenter als matadors locals «Hess and The Spanky Hammers», ils Grischuns dal cor «Dabu Fantastic» e «77 Bombay Street».
In program variant
Venderdi e sonda sa preschentan las artistas ed ils artists sin la tribuna gronda. Sco gia ils ultims onns èn quai blers acts svizzers. Tranter auter era «Mattiu» che ha il 2019 gudagnà la gievgia sin tribuna pitschna ses plaz sin la tribuna gronda. Entaifer quels dus onns è la musica dal chantautur da Trun sa midada. Enstagl d’ina quasi band da famiglia è el ussa sin via cun in stil pli reducì ed experimental e sto uss mussar che quai funcziuna era sin ina tala tribuna.
Sper la «Swissness» metta il comité d’organisaziun era puspè il focus sin in program variant. Cun HipHop (Lo & Leduc, Mimiks, Alligatoah) e Rock (Biffy Clyro, Dropkick Murphys) fin tar pop (Marius Bear, Pedestrians, Lola Marsh, Bastian Baker) e musica electronica e R&B (Mischgewebe, Paul Kalkbrenner e Naomi Lareine) èsi uschia da chattar insatge per in e scadin. Quai che mancà in zic è l’innovaziun ed il ristg d’engaschar in act che n’è anc betg cumprovà, in act cun pizs e chantuns ed in effect da wow. Cler è dentant era gia uss ch’i vegn puspè a dar ina gronda festa sin la quala bleras e blers han spetgà vess dapi il 2019.
