Passar tras la porta sontga e lura pensar che tuts putgads èn perdunads na va betg. Davos quai stat dapli. Ins sto renconuscher tge ch’ins ha fatg fallà e confessar. E lura empruvar da far bun. E quai far bun dastga era far mal, di Flurina Cavegn-Tomaschett en «Vita e cretta».
Il perdun n'ha nagins cunfins.
Era persunas che na pon betg ir a Roma l’onn sontg pon cuntanscher il perdun. Per exempel cun far regularmain visitas a malsauns.
La finamira dad in onn sontg è da sentir la cuminanza cristiana, di Flurina Cavegn-Tomaschett en «Vita e Cretta». Il mument central è il passar tras la porta sontga. I vegn spetgà milliuns pelegrinas e pelegrins durant quest onn sontg a Roma. E quai vegnia a rinforzar la cuminanza cristiana. Da cumparegliar sco tar gronds events da sport, per exempel sco tar gieus olimpics.
Il motto da l’onn sontg è pelegrins da la speranza.
Per abitantas ed abitants da Roma spetgan bleras sfidas. Cunzunt vegni a dar anc dapli turists.
I vegn anc pli caotic, anc pli stretg.
Simona Caminada ch'è correspundenta dad SRF en l’Italia, cusseglia da far tant sco pussaivel a pe durant quest onn sontg a Roma.
Fertant che turisticras e turistichers sa legran da far bunas fatschentas cun las fullas da glieud – han auters quitads. Chattar in'abitaziun vegn anc pli grev, pendular a la lavur vegn anc pli stentus. Ils pretschs per abitaziuns èn s’agumentads, era per hotels, e quai vegnan er ils pelegrins a sentir, di Simona Caminada.
Il pli grond problem durant l’onn sontg 2025 vegni a dar en ils meds publics.
L'onn sontg va enavos sin l’onn 1300 cura che papa Bonifazi IIX ha vulì dar in accent a quest onn. El ha vulì repeter quest onn sontg mintga 100 onns. Dapi il 1470 datti l’onn sontg mintga 25 onns.
L’onn sontg 2025 è vegnì avert ils 24 da december 2024. Lura ha Papa Francestg avert la porta sontga en il dom da son Pieder.
Adatg da plevons fauss che rimnan daners.
