Suenter l’emprima seria-web «Metta da fein» realisescha Radiotelevisiun Svizra Rumantscha uss ina segunda seria rumantscha ficziunala. Las lavurs da filmar per la nova seria «L’ultim Rumantsch» cumenzan la primavaira. Filmada vegn la seria dal matg enfin il zercladur 2023 a Cuira, Turitg ed en auters lieus dal Grischun. «L’ultim Rumantsch» è ina producziun da RTR e Shining Film.
Da tge sa tracti en la nova seria «L'ultim rumantsch»?
En il center da la seria stat la famiglia Durisch, possessura e manadra da la pli gronda chasa da medias dal Grischun. Sco giuven ha Gion-Peder Durisch fundà l’interpresa. Avant onns è el dentant sa decidì da surdar quella a ses figl Gion. Quel vul spargnar e reorganisar la fatschenta e betg pli producir la gasetta nunrentabla «Posta». Il conflict è programmà! Perquai che la Posta è il project da cor da Gion-Peder, na vul el savair nagut pli da ses figl. I na sa tracta betg mo da l’emprima gasetta ch’’el aveva fundà, mabain er da l’ultima gasetta rumantscha en Svizra. Cura che Gion-Peder mora, cumenza il cumbat en famiglia. En ses testament fa el si ina part da la chasa da medias a sia biadia Ladina, quai cun il giavisch ch’ella surpiglia e maina vinavant la Posta. Ma Ladina na vul avair da far nagut cun il mund da las medias e sia famiglia. Dapi onns abita ella a Turitg e cumbatta sco activista cunter concerns gronds e per ils dretgs d’animals. Cura che Ladina vegn conscienta da la muntada da la gasetta, è la tentaziun gronda da profitar da la plattafurma da medias per sias atgnas ideas e valurs.
«L’ultim Rumantsch» è situà en la tensiun dal martgà medial fitg cumpetitiv. Idealissem frunta sin realitads sgarschaivlas, regl da profit sin tradiziun e cuntradas muntagnardas idillicas sin interess urbans. La cultura rumantscha vegn en las stretgas. Ed entamez stat ina dunna giuvna pli sensibla che quai ch’ella vuless atgnamain esser.
L’ultim Rumantsch percepescha la debatta actuala sur d’identitads culturalas da cuminanzas e reflectescha quellas. Er sche la seria è localisada en il Grischun, pudess ella giugar dapertut sin il mund. Cun la seria-web survegnan las aspectaturas ed ils aspectaturs insatge per chau, venter e cor.
La seria en 5 parts vegn producida da Sophie Toth e Timo Raddatz da la Shining Film AG a Turitg. Manuel Sieber ed Anne Sommer da schau. ScRL Cuira èn las persunas da contact sin il lieu. Adrian Perez maina reschia cun la camera dad Aaron Graf. En il writers room han Adrian Perez, Jen Ries e Simon Nagel sviluppà ils scripts. Las filmadas han lieu dal matg enfin fanadur 2023. La diffusiun da la seria è planisada per la primavaira 2024.