Finalmain esi uschè lunsch! La chanzun «Ensemen» da la gruppa da musica Caprihorns e Chiara Jacomet è publitgada ils 6 d'october. Ins chatta la chanzun sin tuttas plattafurmas da streaming, inclus il video da musica. Il toc da musica ch’il chantadur da pop svizzer Nickless ha scrit exclusivamain per la gruppa è naschì or d'in idea da l'uniun da la musica grischuna, la GKMV. L'uniun ha lantschà il project cun la finamira da purtar pli da manaivel la musica instrumentala a la giuventetgna.
Casting
Per pudair realisar quest project ensemen cun il cumponist Nickless ha la band anc stuì chattar ulteriurs musicists e musicistas. Quai han els fatg cun in casting che ha cuzzà sis emnas. Sur lur pagina d'internet han els ed ellas pudì s’annunziar cun emplenir ora in formular e trametter en in audio u in video sco ch'ellas sunan.
Igl era propi bel da vegnir en contact cun ils giuvens e giuvnas ch'èn activs en la musica instrumentala.
La frontwoman
Chiara Jacomet è ina chantadura, cumponista, textista, musicista (Chiara suna ghitarra e clavazzin) e bandleadra sursilvana. Il 2017 ha ella fundà l’emprima girlgroup rumantscha, la fin dal 2021 ha ella cumenzà il duo «ladunna» – e la stad 2023 ha ella interpretà ina nova chanzun cun ils Caprihorns.
Igl è per mai ina gronda onur da dastgar far quai.
Ella na chanta betg mo, mabain scriva er il text per la chanzun. Ensemen cun Bianca Mayer haja ella fatg in pau brainstorming. Ellas hajan mess sin palpiri intgins chavazzins tge ch'il cuntegn duess esser e sin basa da quai scrit il text. I saja ì relativamain spert da scriver il text. Adina puspè eri in zic da surlavurar quel dentant ussa stettia quel. Ina lavur betg disada per Chiara Jacomet, perquai ch'ella scriva normalmain mo text per sias atgnas chanzuns.
Sco ella ha menziunà, haja quella chanzun la suttascripziun musicala da Nickless, ed ella descriva la chanzun uschia: «Jazzy, hip, catchy e per saltar.»
