Betg vulair savair tut dat ina tscherta levezza. Savair ch’ins na sa betg tut fa tut pli lev. I gida pia da reflectar sasez, tadlar tge ch’il visavi di, empruvar da chapir tschel/tschella. In tema pli che actual cun tut ils conflicts sin il mund.
Sch’jau hai l’impressiun che mia vista saja l’unica gista, sch’jau stoss missiunar, lura datti baud ni tard dispitas.
Mintgatant saja munds sche duas persunas discurran da la medema situaziun. La vista sin la medema situaziun po esser cumplettamain in’autra. I sa mussa, i na dat betg be ina perspectiva mabain differentas sin la medema chaussa.
Ma Arno Arquint conceda er ch’i saja impurtant per persunas giuvnas da chattar l’atgna opiniun, l’atgna identitad. Lura fai senn dad esser in zic extrem. Ma cun l’experientscha da la vita duess ins vesair ch’il mund na funcziuna betg uschè simpel.
I va per chapir che mia vista è be MIA perspectiva. Ed igl è central da chapir ch’ins po vesair la chaussa er auter.