Mx3 festivescha ses 15avel anniversari
Gia a partir dals onns 90 exista in inscunter da las terzas chadainas da la SRG/SSR, da SRF 3, Couleur3, Rete Tre ed SRF Virus. Per RTR era da lezzas uras il Battaporta represchentant en quella gruppa. La finamira era da far acziuns cuminaivlas, sa preschentar a festivals da musica, barattar concerts e registraziuns.
L’idea
Il 2004 aveva quella gruppa survegnì l’incumbensa da crear in project pli ambizius cun integrar tut ils radios ch'èn sa participads. Ina da las ideas è stada quella da stgaffir ina plattafurma digitala e gratuita per la musica svizra, per pop e rock, hip hop e funk, jazz e reggae. La finamira principala: promover musica svizra ed augmentar sia preschientscha en ils radios da la SSR.
La sfida
In dals gronds puncts da resolver: las dumondas tecnicas, co construir la plattafurma, tge pussaivladads datti per artistas e bands, tge niz ha noss public? Il svilup da l’emprima versiun da Mx3 ha durà divers mais, fin che tut las pretensiuns èn stadas accumplidas. Per exempel: chattar bands ed infurmaziuns tenor gener e regiuns e pudair tadlar lur chanzuns e vesair lur videos.
La partenza
Ils 15 da settember dal 2006 è stà il di da partenza da Mx3, e tut ils involvids eran plain mirveglias. Vegn quai a funcziunar bain – u datti in flop? La resposta è stada ina gronda surpraisa. Suenter be 48 uras eran s’annunziadas 1'000 artistas e bands cun lur chanzuns, biografias, fotografias, videos e chalenders da concerts. Uss, 15 onns pli tard, datti prest 30’000 bands ed interprets ed interpretas da tut las regiuns sin Mx3, per las redacziuns da musica ina funtauna preziusa per scuvrir musica nova. Ed er la Svizra rumantscha è preschenta cun artistas ed artists: da Pascal Gamboni fin Chiara – e da Gianni Tschenett e sia band Oak Street fin tar Curdin Nicolay. Actualmain datti mintga di var 100’000 visitas sin la pagina.
Il svilup: adina dapli pussaivladads
Pli tard è l’offerta da Mx3 vegnida augmentada. Er festivals, clubs e labels da musica han survegnì l’occasiun da sa participar, i dat playlists da tut ils geners, las bands pon er preschentar lur videos, i dat pussaivladads per far concurrenzas e da gudagnar per exempel preschientscha tar festivals ed open airs. Ed il svilup cuntinuescha.
Il stream à la carte
Quai è in player da musica che po vegnir configurà. El mussa lura il meglier da las 120’000 chanzuns e videos sin Mx3. Dapi 15 onns selecziuneschan las redacziuns da musica affiliadas la musica. Quella datti uss er sin il smartphone ubain sco widget. Qua rivas ti sin noss stream à la carte:
Concerts sin il natalezi
Sin il giubileum da 15 onns mx3.ch èn otg musicistas e musicists svizzers sa preschentads a Fribourg en il club Fri-Son. En l'emprima part da quest concert udis vus las producziuns da Caroline Alves, Fiona Fiasco e Melodiesinfonie, Sam Himself ed Animor.
Dapli da Mx3
- • Dapi il 2019 datti er ina plattafurma per musica contemporana • Dapi il 2019 datti er ina plattafurma per musica contemporana
- • Gia dapi il 2009 chattan amaturas ed amaturs da musica populara in'offerta sumeglianta • Gia dapi il 2009 chattan amaturas ed amaturs da musica populara in'offerta sumeglianta