A Zuoz datti a partir da quest atun in nov festival da teater e litteratura rumantscha. Il «festival travers Zuoz» vul envidar mintga atun durant 3 dis a represchentaziuns, prelecziuns scenicas, concerts e – mintga 2 onns – a la premiera d'in teater rumantsch, uschia ils iniziants da l'«Uniun Travers».
Entant è lantschada la concurrenza da scriver «premi dramatic travers» che è dotà cun 15'000 francs. Il premi vegn finanzià da la Lia Rumantscha e la vischnanca da Zuoz. El sa drizza ad auturas ed auturs e collectivs che scrivan rumantsch.
Jau sun persvadida che nus avain dapli che trais scripturs potenzials, dentant era betg 30. Quai duai sa sviluppar grazia il premi.
L'intent è da promover il scriver dramatic rumantsch. Il toc che gudogna la concurrenza vegn mintgamai mussà sco premiera l'onn suandant a Zuoz. La vischnanca vul sa posiziunar sco lieu da cultura e teater.