L’idea da basa era da fundar in chor maschadà per las vischnancas da Tujetsch, Medel e Mustér. Perquai è il chor maschadà da Sedrun vegnì renumnà il 2018 en las «Vuschs dil Rein», declera il dirigent Claudio Simonet. El ha alura era surpiglià la batgetta dal nov chor. Ils emprims onns han ins chattà avunda chantaduras e chantadurs, ma quels vegnan adina pli vigls e la finala n’han ins suenter la radunanza generala betg pli chattà persunas per la suprastanza. Quai ha dà il stausch da dir «nus sa schliain, ma nus faschain anc in concert da Nadal», declera Claudio Simonet. Ma suenter las primas emprovas per il concert ha il project stuì vegnir abolì perquai che l’engaschi da las chantaduras ed ils chantadurs n’era betg sco giavischà, di Simonet che ha blers onns manà la scola da musica da la Surselva.
Nus avain in foss tranter glieud pli veglia e persunas giuvnas che n'èn betg pli prontas da sa dar vi.
Midada da generaziun e da la preferenza da musica
Il motiv principal per schliar il chor è la midada da generaziun. La giuventetgna na saja savens betg pli pronta da s’engaschar en chors tradiziunals e preferescha furmaziuns musicalas cun ina direcziun professiunala. Ils repertoris tradiziunals dals chors na correspundian simplamain betg pli als gusts da la giuventetgna e perquai vegnan quels era a svanir, quai l'avis da Claudio Simonet.
Perspectivas e svilup
La giuventetgna vul chantar, quai sa mussa en il chors d’uffants, ma era en pliras autras furmaziuns, ch’han success e lavura surtut en furma da projects. Els vegnian a manar vinavant la tradiziun musicala ma en lur furma, di Claudio Simonet. Era sch’ils chors tradiziunals perdan lur impurtanza, dat quai vinavant in grond potenzial per projects novs che correspundan pli fitg a la giuventetgna e che mantegnan vinavant la diversitad culturala. La sfida saja da promover quels svilups, uschia Claudio Simonet.
