Ils set da zercladur 1940 è Thomas John Woodward naschì a Pontypridd – ina pitschna citad en Valisa. Sias emprimas emprovas da chant èn spiritualas: el ha chantà en il chor da baselgia. Gia suenter ses temp da scola cun mo 16 onns ha Tom maridà sia camarata da scola Melinda Trenchard. Cun ella è el stà maridà 59 onns fin ch’ella è morta avant quatter onns.
Carriera musicala pass per pass
Tom Jones ha da gliez temp gudagnà ses daners cun vender tschitschapulvras, cun lavurs sin plazzals e cun gidar en fabricas. En ses temp liber ha el chantà en clubs locals. Cun il num d’artist Tommy Scott e sustegnì da la band «Senators». Suenter curt temp èn els daventads pitschens stars en lur regiun. Tom ha dentant vulì daventar musicist professiunal ed ha registrà insaquantas chanzuns ch’èn dentant vegnidas publitgadas pir intgins onns pli tard. Là sa decida Tom per ina carriera da solo e fa ina turnea atras la Gronda Britannia. Il producent Gordon Mills ha scuvrì Tom en in club a Londra e fatg in contract cun el.
Tom Jones il dongiovanni
Ses producent nov dat ad el il num d’artist Tom Jones ch’è restà fin oz. Cun la single «It’s Not Unusual» cuntanscha el directamain la testa da la parada da hits englaisa e daventa enconuschent era sur ils cunfins da l’insla. Il pass definitiv en las paradas da hits internaziunalas gartegia ad el la fin dals onns 60. Da quest temp ha el dastgà far la chanzun per il film da James Bond «Thunderball» e cun «Delilah», «What’s New Pussycat» ni «Green, Green Grass Of Home» gartegia ad el in hit suenter l’auter. Durant ses concerts giaudan oravant tut giuvnas sia vusch da soul. Ed era opticamain porscha Tom Jones ina massa. El sa preschenta adina en chautschas stretgas e cun ina chamischa fitg averta che mussà ses pelegn dal pèz. Per quest motiv è el era vegnì numnà il tigher.
Midadas suondan al temp ruassaivel
Suenter ses grond success durant ils onns 60 suondan onns pli ruassaivels. El sa preschenta pli savens durant shows a Las Vegas. Pli e pli paucs van a tadlar ses concerts. La mort da ses producent ed ami Gordon Mills il 1986 è il punct il pli bass da sia carriera. Suenter cumenza Tom Jones novas vias musicalas, lavura ensemen cun differentas artistas ed artists e sa lavura puspè ensi. Enfin l’onn 1999 cura ch’el publitgescha ses album da success «Reload» cun in da ses pli gronds hits «Sex Bomb». Cun quest album sa schlia el definitiv da ses «tigher-image». 2005 fa la Queen el chavalier. Actualmain è sir Tom Jones da vesair en televisiun sco coach tar l’emissiun «The Voice UK».