«La glina – il mund na rotescha enturn el, ma stess el eri sa midass l’entira terra». Uschia cumenza l’album da la rappadra Gigi da Maiavilla. En in curt text tira ella parallelas tranter ella e la glina. Il mund na sa volvia betg enturn ella, dentant sch’ella stettia eri lura stettia era ses mund eri. Gigi ha ambiziuns, vul cuntanscher bler ed è dapi sia cumparsa en il Cypher 2022 ina staila fixa en la scena da rap grischuna e svizra.
Ses album da debut sa numna «Hinterem Mond» cuntegn 12 chanzuns per tudestg svizzer. Sin quels termaglia ella cun differents stils da rap cun beats variants e demussa cun ses flow daco ch’ella ha avant trais onns gì uschè success tar il Cypher. La surpraisa sin l’album èn dentant chanzuns sco la versiun acustica da «FERNWEH» ubain «Alive». Qua mussa Gigi in’autra fassetta cun parts da chant ubain cun «Alive» era ina chanzun da pop. Era tschellas chanzuns cuntegnan per part elements da reggaeton, techno u era balladas – Per ella in pau da tuttas sorts che fa plaschair ad ella sezza.
Davos la glina
Il titel dastgia dar spazi per interpretaziun – insatgi che viva davos la glina n’è normalmain plitost connotà negativ. Ina persuna che n’è betg infurmada e sa betg las chaussas actualas. Per la rappadra saja quai stà il motiv da prender quella locuziun e midar ella en insatge positiv. Ins chapescha, vesa il mund in pau auter che auters dentant buc fauss.
Jau tir insatge tar mai ch’è atgnamain manegià negativ e fatsch insatge per mes avantatg ordlonder.
Chavaltgar, famiglia e Harry Potter
Ils cuntegns da las chanzuns da la giuvna da 24 onns varieschan tranter tematicas privatas davart sia famiglia ubain sentiments e dubis. Cuntegnan dentant era parts (pli u main) zuppads davart ses hobi d’uffanza chavaltgar ubain da Harry Potter. Quai saja musicalmain sco era dal cuntegn anora dentant be in’impressiun dal mument. Uss saja ella gia puspè vid far musica nova.
Igl è in album fitg avert ed autentic en il qual Gigi raquinta da quai e fa quai che plascha ad ella. En il medem mument èsi in emprim pass tar ina finamira pli gronda – La musicista vul daventar uschè «gronda» en la scena da musica svizra ch’ella possia avrir las portas per artistas ed artists che vegnan suenter ella – per savair mussar ch’ella haja era pudì far il pass da davos la glina ellas glischs da las tribunas grondas.
Jau vuless fitg gugent vegnir tar in punct nua ch’jau poss avrir portas e dir entra!
L’intervista cumpletta pudais tadlar qua:
