Vico Torriani è naschì ils 21 da settember 1920 a Genevra sut ses num da batten Ludovico Oxans. El ha ina sora schumellina ed ina sora ed in frar pli giuven. El è creschì si a Schlarigna e San Murezzan en relaziuns famigliaras betg adina uschè bunas.
Burgais è la famiglia Torriani da la Bregaglia (Soglio). Suenter scola ha Vico fatg in emprendissadi sco conditer, cuschinier e pli tard anc camarier. Professiuns ch'el ha pli tard pudì duvrar en sias emissiuns ed en ses films. Sia carriera sco chantadur, star da schlagher, actur, entertainer e cuschinier da televisiun ha el lantschà a San Murezzan sco liftier chantant e magister da skis jodlant. Gia sco giuven da 15 onns ha el dà concerts privats.
Ord sia vita
-
Bild 1 von 7Legenda: Vico Torriani è mort cun 77 onns ad Agno en il chantun Tessin. Keystone -
Bild 2 von 7Legenda: Vico Torriani durant ina da sias ultimas preschentaziuns en la publicitad. Keystone
-
Bild 3 von 7Legenda: Vico Torriani en acziun sco chantadur (datum betg enconuschent) Keystone
-
Bild 4 von 7Legenda: Vico Torriani e sia dunna Evelyne (nata Güntert) èn stads maridads dapi il 1952. Els han dus uffants: Nicole e Reto (foto dal schaner 1955) Keystone
-
Bild 5 von 7Legenda: La giuvna famiglia en l'auto cun la figlia Nicole ed il tgaun Lucky (onn 1956) Keystone
-
Bild 6 von 7Legenda: Vico sco showmaster en il quiz da televisiun «Der goldene Schuss» (foto dals 27.08.1967) Keystone
-
Bild 7 von 7Legenda: Vico Torriani en discurs cun il musicist svizzer Teddy Stauffer (per l'emissiun «Der goldene Schuss», foto dal matg 1969) Keystone
Suenter la Segunda Guerra mundiala l'onn 1945 ha el gudagnà ina concurrenza da giuvens talents ed è suenter viagià tras l'entira Europa. Il 1947 ha el registrà sia emprima platta e realisà dus onns pli tard ses emprim hit en Svizra cun la chanzun «Silberfäden».
Il 1951 ha el gì ses emprim success er en la Germania cun «Addio, donna grazia». L'emprim hit numer 1 en la Germania ha el pudì realisar il 1957 cun la chanzun «Siebenmal in der Woche», e trais onns pli tard cun «Kalkutta liegt am Ganges».
Sper il chant ha Vico Torriani er gì engaschaments en la televisiun sco era en films. Il film cun il pli grond success è stà «Die Gitarren der Liebe» (1954).
Durant sia lunga carriera venda el passa 20 milliuns portatuns, e sias emissiuns da televisiun («Grüezi Vico», «Hotel Victoria» (1961-1968), «Die Vico-Torriani-Show», «Der goldene Schuss» (1967 - 1970)) èn stadas spazzastradas cun quotas d'aspectaturas da 80%. Vico Torriani era il preferì dal public, e cun chanzuns sco «Kalkutta liegt am Ganges» e «Schön und kaffeebraun» procurava el per divertiment cun elements exotics e pli tard er populars.
Ils onns 60 ha sia musica pers in zic l'interess, e davent dals onns 70 ha el manà ad Agno (Tessin) ina vita ralentada. Il 1976 lura ha Vico Torriani anc ina giada lantschà da nov sia carriera cun la chanzun «La Pastorella». Il nov stil da musica da Torriani è datiers al stil che nus enconuschain anc oz sut la noziun schlagher popular.
Pli tard è Vico Torriani er stà ustier, tranter auter a Basilea nua ch'el ha manà dal 1978 fin il 1983 l'ustaria Bonne Auberge. Vitiers ha el er scrit divers cudeschs da cuschinar.
Cun il schlagher «Capri-Fischer» è el vegnì il 1982 sin plazza 1 da la show dal ZDF «Die schönsten Melodien der Welt». L'onn 1995 è el vegnì onurà cun il «Bambi Lifetime-Award» ed en Svizra cun il «Ehren-Prix-Walo». Ils 25 da favrer 1998 mora Vico Torriani en la vegliadetgna da 77 onns en il Tessin nua ch'el è era sepulì.
Sia biografia «Vico Torriani - Ein Engadiner singt sich in die Welt» è cumparida sin ses 100avel anniversari il settember 2020. Sia figlia Nicole Kündig-Torriani e l'autura Barbara Tänzler han cun quella realisà in purtret fitg cumplessiv da la vita d'in dals pli gronds entertainers svizzers.
Dapli da Vico Torriani
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.