Ils 27 da matg 1949 è naschì ad Andeer Curò Mani. Ensemen cun ses quatter fragliuns (duas soras e dus frars) è el creschì si en in ambient famigliar. Ses bab Curò Mani era magister secundar ed ha promovì fitg il giuven Curò. Lez era da pitschen ensi fascinà da la musica. Tenor el fiss era ses bab gugent daventà musicists, ma las relaziuns da lura n'han betg laschà tiers quai. Tant pli ha Curò senior purschì a ses uffants ina scolaziun da musica, era en famiglia han els sunà bler ensemen.
Dad Andeer a San Murezzan
Cura che Curò junior ha adina puspè sunà il clavazin (senza notas) ha ses bab guardà ch'el survegni uras da clavazin. E quest instrument accumpogna el dapi lura. Era cura che la famiglia ha fatg midada a San Murezzan ha el vinavant gì instrucziun da clavazin. Suenter la scola populara (1. classa ad Andeer e ils ulteriurs 8 onns a San Murezzan) è Curò junior sa decidì da far il seminari da magisters. A Cuira ha el gì lecziuns da clavazin tar Benedetg Dolf e la finala survegnì dad el per l'examen final sin clavazin la nota «6». Cun gronda motivaziun ha Curò Mani lura fatg il conservatori a Turitg. El na vuleva dentant betg daventar pianist da concert, mabain vuleva instruir musica en ina scola media.
Da la primara a la scola media
Terminà il studi da clavazin è Curò returnà en il Grischun, a Davos Frauenkirch, sco magister primar. Per in congress da las puras svizras a Tavau ha el scrit in teater musical e quel ha festivà grond success. Er vis quest gieu han persunas da la Scola media alpina Tavau. E lez han vulì pladir Curò sco magister da musica, dentant sut la cundiziun d'absolver il diplom «Schulmusik II» (instrucziun da musica en scolas medias). Cun grond gust ha il giuven scolast fatg quest studi accumpagnant al dar scola. Cun il chor da la Scola media alpina Tavau ha Curò Mani festivà plirs success a divers concerts ed a festas da chant. Il 1982 ha el gudagnà cun quest chor il «Concours de l'étoile d'or» da la Télévision de la Suisse Romande a Genevra cun sia chanzun «Dorma, dorm'uffant divin».
Dal 1970 fin il 20012 ha el instruì musica a tschintg differentas scolas en il Grischun. Per bleras occasiuns ha el er scrit teaters e gieus en il liber. (p.ex. «St. Moritzer Mosaik», «Flommas in Rezia», «Tafaas», «Der Gnom und die Ameise», «La Fuschella» u «rAmurs»).
Dal pianist al cumponist
En l'infratemp ha Curò Mani er maridà, ina giuvna che ha lavurà a Tavau e che ha gì tar el uras da clavazin, Isabella Vital. Ad ella è Curò fitg engraziaivel er per sia lavur davos las culissas, saja quai sco mamma da trais figls (Orlando, Chasper-Curò e Roman-Andri) ed era per la lavur da secretaria per in musicist, cumponist e dirigent. Ella ha tegnì liber ad el il dies per ses engaschi sco dirigent e cumponist.
Jau hai gì enorma fortuna da survegnir ina dunna sco l'Isabella. El ha sustegnì mai fitg, è toleranta ed ha fatg immensa lavur, era quasi mia dunna e secretaria. Jau sun fitg engraziaivel.
Ses grond success cun la chanzun «Dorma, dorm'uffant divin» han motivà anc pli fitg da cumponer. Intginas da quellas han purtà gronda stima e success: «La nona fila», «Las giallinas» ni «Surses» (2. plaz il 2005 a la concurrenza «la chanzun rumantscha», gudagnà ha «La sera sper il lag»). La chanzun «Surses» vala sco imni da la vischnanca Surses. Questa chanzun cun text da pader Alexander Lozza ha Curò Manì scrit per il chor viril Surses. Passa diesch onns ha el dirigì quest chor ed è dirigent d'onur da quel.
En tut ha el scrit passa 200 chanzuns per chor, musica d'orchester e musica per furmaziuns da musica populara. Sia preziusa lavur è er vegnida onurada pliras giadas (p.ex. 1983 premi da promoziun da cultura dal chantun GR, 1992 premi Hans-Martin Enderlin da la Walservereinigung, 2001 premi CRR, 2021 premi da renconuschientscha da la regenza grischuna).
Curò Mani-Vital po guardar enavos sin ina vita plain musica, anc oz suna el mintgadi il clavazin, magari er ensemen cun autras persunas. Dapi il 2009 abitescha el ensemen cun Isabella ad Ardez e giauda sia bainmeritada pensiun. Plaschair ha el er da las visitas da ses figls cun lur famiglias e ses biadis.
Curò Mani en emissiuns da RTR:
Artg musical
Noss chors
