Ils 11 da favrer 1963 è naschì a Trun Corsin Tuor sco tschintgavel da sis uffants dals geniturs Anton e Barla Tuor. Sia uffanza è segnada da blera lavur. Ils sis uffants han gì da gidar ils geniturs ch'avevan ina stizun da chalzers e da sport a Trun. La musica ha dentant da pitschen ensi giugà ina rolla impurtanta.
En nossa famiglia avain nus adina fatg musica ensemen, sulet la mamma tadlava tiers.
Ses bab sunava en la Societad da musica Trun nua ch'er el e ses trais frars èn pli tard daventads commembers. Dentant han era sias duas soras veglias emprendì instruments uschia che la famiglia Tuor ha gì ses orchester da famiglia.
Emprims pass musicals
Sco buob ha Corsin Tuor cumenzà a sunar la trumbetta enfin ch'el n'aveva betg pli plaschair. Ses geniturs n'han però betg laschà chalar el ed han pretendì da tegnair la dira. Per questa tenuta dals geniturs è Corsin anc oz engraziaivel. El ha lura midà da la trumbetta sin eufoni e survegnì dapli gust da trenar e sunar. Grazia ad in regal da ses padrin, ina platta da la Black Dyke Mills Band, ha cumenzà en el l'ardur per la musica da brass band.
El ha trenà intensivamain, ha visità concerts e concurrenzas da brass band ed era fascinà da quest stil da musica. A Trun ha el confundà il Quartet Instrumental e pli tard inizià il Cerchel Musical dalla Surselva, in ensemble da sturs cun 10 musicants laics.
Emprendissadi e studi
Suenter scola ha Corsin Tuor fatg in emprendissadi sco chalger-ortoped ed er lavurà passa quatter onns sin quest mastergn. L'amur e la fascinaziun per la musica instrumentala eran dentant pli grondas. A Lucerna ha el studegià eufoni ed è entrà en la brass band Bürgermusik Luzern (BML) nua ch'el è daventà solo-eufonist. Plirs onns è el era stà commember dal Tuba Quartett Luzern. Parallel al studi ha el maridà sia dunna Jovita, fundà famiglia (dus uffants), ha dirigì la musica da Rickenbach ed è vinavant s'engaschà fermamain sco dirigent dal Cerchel Musical dalla Surselva. Cun quel ha el realisà divers portatuns ( 1993:«Moviments» , 1995: «Nadal», 1996: «Classic Rock» (ensemen cun ils Cantins), 1997: «Fantasia», 2000: «Classic Cinema» (ensemen cun ils Cantins), 2001: «America»). In temp intensiv che n'è tenor Corsin Tuor mai tschessà e che dura probablamain fin sia pensiun.
Dal musicant al dirigent
Ils onns 90 han Corsin Tuor e sia dunna Jovita gì il giavisch da bajegiar ina chasa. Per pudair realisar l'atgna chasa ha el dentant duvrà dapli entradas, perquai ha el surpiglià ina segunda societad da musica, la brass band Harmonie Neuenkirch. Pauc temp suenter ha el pudì diriger ina brass band che sunava en la categoria superiura, la MG Risch-Rotkreuz, avant ch'el ha gì la chaschun da returnar tar la BML, questa giada dentant sco dirigent. Cun quella furmaziun ha el tranter auter registrà il disc «Perlas rumantschas I» (2006).
25 onns, dal 1990 fin il 2015, ha Corsin Tuor dirigì cun grond success la musica da Rickenbach nua ch'el ha era survegnì ina plazza sco magister da musica a la scola da musica Michelsamt. Là ha el pudì bajegiar si ina generaziun da giuvnas musicantas e giuvens musicants. Sco engraziament per ses grond engaschi ha la musica da Rickenbach elegì el sco dirigent d'onur.
Il chantun Grischun ha onurà Corsin Tuor il 1998 cun in premi da promoziun e da la vischnanca da Trun ha el survegnì il 2010 il premi da cultura.
Dapli da Corsin Tuor
L'onn 2011 ha Corsin Tuor surpiglià la Brass Band Berner Oberland. La furmaziun era en ina crisa e grazia a l'engaschament da Corsin Tuor èsi gartegià da returnar sin la via da success. Cun questa band d'auta qualitad ha Corsin Tuor er realisà divers projects cun in «touch» rumantsch, per exempel ils discs cumpacts «Perlas rumantschas II e III» (2013 e 2019) e concerts communabels ensemen cun il chor Cantus Firmus, l'ensemble vocal Incantanti e l'ensemble DeCanto.
La redactura da televisiun Bertilla Giossi ha fatg in film cun Corsin Tuor ed accumpagnà el e la Brass Band Berner Oberland durant la preparaziun per la concurrenza naziunala da brass band a Montreux.
Ils onns 2018 e 2022 ha el gudagnà cun la BBO il Swiss Open a Lucerna. Era al campiunadi svizzer da brass band ha el cuntanschì pliras giadas ina plazza da podest. Per la victoria n'hai dentant betg tanschì. La fin dal 2022 ha el dà giu la batgetta da la BBO.
Dapi il 2017 dirigia Corsin Tuor la Brass Band Fröschl Hall (Austria) e dapi il 2020 la 3BA Concert Band (Germania). El vegn er adina dumandà sco dirigent ospitant, uschia per exempel la stad 2022 sco dirigent da la A-Band da la NJBB (Nationale Jugend Brass Band).
Sper ses engaschi regular sco dirigent lavura Corsin Tuor a la scola da musica da la citad da Lucerna sco maina partiziun (instruments da flad e percussiun). Vitiers è el docent per diriger a la Scol'auta per art a Berna, nua ch'el instruescha era l'istorgia e la litteratura da brass.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.