Carli Scherrer è naschì ils 12 da settember 1938 a Darvella / Trun. Ses bab Emil Scherrer era immigrà il 1929 da Bazenheid (Toggenburg) en Surselva ed ha lavurà sco cusunz en la fabrica da ponn «Truns». Là ha el emprendì d'enconuscher Matilda Defuns ch'è daventada sia dunna. Carli è creschì si ensemen cun sias duas soras Marietta e Claudia. Suenter la scola populara ha el frequentà il seminari da scolasts a Cuira ch'è er stà in bun fundament per la clamada ed er per chant e musica. Suenter il seminari ha el survegnì ina plazza en ses vitg nativ Trun ed è stà magister cun corp ed olma. Or da sia stanza da scola da la 4. - 6. classa tunavan savens chanzuns.
Sveglià en el il plaschair vid chant e musica hajan ses magisters en scola primara e secundara a Trun, ha scrit Carli Scherrer il 2009 en il booklet dal disc cumpact «Passidas». Els sunavan las orglas en vischnanca, mussavan bellas chanzuns en scola, scrivevan poesias e chanzuns per chors e teaters e faschevan da dirigents e reschissurs. Els sajan stads ils animaturs culturals, uschia Carli Scherrer.
Dal magister al promotur linguistic
En spezial en Surselva dentant er en autras valladas rumantschas è el vegnì enconuschent pervi ses grond engaschi sco collavuratur da la Lia Rumantscha. El è stà l'emprim collavuratur regiunal da la LR en Surselva (1984 - 2000). In da ses gronds merits èn stadas las inscripziuns rumantschas tar las fatschentas. Quai che n'è betg stà simpel da lezs onns cun il turissem creschent. Grazia a ses engaschi consequent e perseverant (el sez ha numnà quai «romontschaziuns») èn anc oz vesaivel las inscripziuns da fatschentas en divers vitgs rumantschs.
Engaschi per la lingua rumantscha
Betg mo la lingua rumantscha è stada a cor al promotur Carli Scherrer. El ha era gì grond gust e dun da scriver chanzuns. Sper il direger (a Trun la musica ed il chor cecilian, a Zignau il chor baselgia ed a Schlans il chor) e sunar l'orgla è cumponer stà sia gronda pissiun. El ha gì in dun da scriver per «noss chors», vul dir chanzuns adattadas per las abilitads d'in chor dal vitg. Sia pli impurtanta cumposiziun è probabel «La passiun da Jesus Christus». El ha scrit bleras chanzuns sacralas ha dentant er adina puspè laschà inspirar da poesias e texts d'auturs rumantschs per scriver novas chanzuns. Ses relasch è da gronda impurtanza per la cultura rumantscha.
Famiglia musicala
La musicalitad hajan ses uffants ertà da la mamma, ha Scherrer ditg avant intgins onns. En lur famiglia dominava il chant. Era haja el emprendì d'enconuscher sia dunna Sabina per amur dal chant ed ha maridà ella il 1967. Lur quatter figlias (Letizia, Judit, Angelica e Rosvita) èn sa preschentadas intgins onns sco quartet feminin, Soras Scherrer e magari èn ellas vegnidas accumpagnadas al clavaziun dal figl Clau, ch'è oz il manader da la scola da musica Surselva e dirigent da plirs chors.
Ils 12 d'avrigl 2023 mora Carli Scherrer en la chasa d'attempads a Trun, be curt suenter la figlia Rosvita ch'è morta en consequenza d'ina greva malsogna.
Ivettas da las Soras Scherrer
Cumposiziuns da Carli Scherrer en nossas emissiuns:
Artg musical:
Noss chors:
