Ils 12 d'october 1900 è naschida a Berna Anny Roth-Dalbert, la figlia da l'immigrant talian Carlo Paglia e da la Genevrina Jeanne Weidele. Cu ella ha 12 onns mida la famiglia ses domicil a Turitg e cun 17 onns va Anny al conservatori, sco ina da las primas dunnas en Svizra. Ses roms principals èn chant e clavazin. Cun 24 onns marida ella il translatur Christian Dalbert. Duas figlias cumpleneschan la ventira da la lètg. Il 1930 sa chasan els a San Murezzan. Là separan lura las vias dad Anny e Christian. Il bab banduna la famiglia.
Per la giuvna famiglia cumenza in grev temp. Cun dar uras da clavazin en l'entira Engiadin'Ota, diriger chors (Cor cecilian San Murezzan, Cor da dunnas Puntraschigna, Männerchor Frohsinn St. Moritz) ed accumpagnar solistas e solists po Anny gudagnar gist avunda per segirar l'existenza dad ella e sias duas figlias.
Suenter entgins onns empren ella d'enconuscher e charezzar Hermann Roth. Cun 40 onns ha ella maridà l'architect e la via è uschia vegnida main carpusa. Anny è vegnida sustegnida e promovida per sia lavur da cumponista. Tuttina resta si'ovra ditg pauc enconuschenta. Betg il davos er perquai che la societad ed ils cumponists masculins avevan ditg l'idea abstrusa che dunnas na possian betg cumponer.
L'ovra da Anny Roth-Dalbert è vasta, radund 1'000 cumposiziuns. Sia specialitad èn las «miniaturas» per clavazin u er per furmaziuns vocalas. L'inspiraziun per quests tocs curts chatta ella savens en poesias u d'improvisaziuns al clavazin.
Anny Roth-Dalbert en emissiuns da RTR:
Cuntrasts / Telesguard:
Artg musical dals 11 d'october 2000:
