En la musica datti adina puspè bellas cumbinaziuns e collavuraziuns. I vegn fatg experiments cun far versiuns da pop da melodias popularas, tocs da jazz vegnan duvrads per versiuns classicas ubain ina chapella populara che fa sia versiun d’in semperverd da la musica da rock. Uss datti er ina versiun tut speziala d’in toc da la band Diabolic da la Val Müstair.
«Patria» en versiun per brass
Il 2016 è cumparì l’album «Per sbrüer» dals Diabolics, cun tocs sco: «Cowboy grischunais», «Mare» ed er la chanzun «Patria», ina ballada cumponida da Ivan Zangerle. Da quel datti uss ina versiun arranschada per furmaziun da brass.
Per cas è el rivà sin Mario Bürki, in dals musicants, dirigents e cumponists ils pli enconuschents da la scena da brass:
Mario Bürki ha arranschà la versiun per brass e lura ha el chatta ina fitg buna furmaziun, ina che è stada il 2018 campiunessa svizra en la categoria da l’elita. Quella ha lura exercità e registrà il toc. Ed il resultat cuntenta il cumponist Ivan Zangerle. El spera er ch'autras furmaziuns suna ina giada il toc.
