L'album cumpiglia 13 chanzuns en tudestg svizzer. I sa tracta da chanzuns da pop cun elements da la musica populara. Quai sentan ins tar ils arranschaments cun instruments acustics e tals ch'ins chatta plitost en la musica tradiziunala svizra. Per exempel l’arpret u l’armonium.
In album fitg variant cun chanzuns ch’èn per part calmas e per part fitg sveltas. Tocs cun temas che van fitg profund e tocs ch’èn divertents. In album ch’ins po simplamain prender cun sai sco proviant. Ins senta ch’insatgi ha il desideri da partir en il lontan.
Kunz raquinta ch'el saja ì cun dus da ses musicists ch’accumpognan el gia daditg en in hotel en vischinanza dal Hasliberg en la regiun d’Interlaken. En questa regiun muntagnarda han ils trais musicists ed amis fatg musica ensemen.
Insaquants tocs aveva Kunz gia cumponì, quels han be duvrà in arranschament. Las ulteriuras chanzuns èn naschidas durant il process creativ cun empruvar differentas ideas musicalas. Il musicist da Lucerna di ch'el haja prendì sapientivamain la decisiun da betg far memia bleras ponderaziuns davart arranschaments da las chanzuns. En general haja el vulì far musica cun il battarist Manu e cun l'arpist Chris. Impurtant saja stà ch’ideas possian nascher e prosperar senza in corset e senza in raster. Gist sch’ins fa gia dapi daditg musica ensemen, sajan talas decisiuns impurtantas.
Jau na poss betg m'imaginar da betg far musica.
A l'entschatta: text u musica?
Per la tematica dals texts e per la cumposiziun da las melodias è Kunz responsabel. Che quai vegnia dad el sez stat fitg a cor ad el. Ma Kunz lascha era bler spazi als musicists per inputs ed ideas che han da far cun l’arranschament da las chanzuns. I duai esser in lieu nua ch’ins po s'exprimer e laschar nascher visiuns. Avair plaschair da far communablamain musica saja in punct central.
I dat chantauturas e chantauturs nua ch'il text exista avant la musica. Tar auters èsi precis il cuntrari e tar tschertins naschan tuts dus ensemen. Il musicist raquinta durant l'intervista ch'el fa part dals segunds, pia che la musica vegn avant il text. Mintgatant poi dar che omadus naschan il medem temp – quai sajan lura fitg bels muments.
Release, concerts e congedi
L’um da 38 onns, ch’è dapi 10 onns regularmain u sin tribunas grondas en Svizra u en il studio per registrar nova musica, fa suenter quest album ina pausa pli lunga. Quella vegn ad avair lieu la fin favrer 2024, cura che la turnea da concerts è a fin. Dapi il 2015 ha el publitgà mintga dus onns in album.
Sin la dumonda co ch'el sa senta, sch'el pensa vi da questa pausa, respunda il Lucernais ch'el na realiseschia anc betg quai per il mument. Actualmain saja el anc cumplet en l’uss, cun la publicaziun da l'album e cun la planisaziun e l'organisaziun dals proxims concerts. El fetschia gia sia entira vita musica ed haja anc mai fatg uschè ina pausa. Il patratg ch'i vegnia ruassaivel saja gia da vegl ennà curius per el.
I n’è betg grev da vesair che Kunz sa senta da chasa sin tribuna. Sch’ins ha ina giada gì il gaudi d’astgar vesair il musicist live, san ins ch’el va vi da ses cunfins. Igl è fascinant da vesair co el sa mova ed agescha sin tribuna. Esser sin tribuna, crear cun autra glieud insatge che divertescha e commuventa il public saja insatge dal pli bel. En scadin cas ha l’auditori retschavì in pulit proviant per il proxim temp e po sa legrar da tge che spetga anc sco proxim dal musicist Kunz.
En il Grischun pon ins vesair Kunz live ils 16 da december 2023 en il Guaud magic da Lai.
