Differentas furmaziuns chantan oz per talian. Chanzuns popularas talianas emplainan quest’ura da «Noss chors». I sa tracta d’ina maschaida da chanzuns tradiziunalas ed in u l’auter arranschament che cuntegna intginas sgnoccas ed inqual experiment.
Goccia di voci, Corale Pro Ticino San Gallo, Chors dals Paslers ed il Kammerchor Chur procuran per in’ura cun chant talian che porscha adina puspè er tuns e suns plain umor. I vegn chantà da l’amur, da la furmicla ed il grigl, da musicists, d’in bel glindesdi ed anc bler auter.
