Noss chors - Temp da primavaira - Cultura

Noss chors Temp da primavaira

En blers lieus stendan las emprimas fluras da primavaira lur chaus vers il sulegl ed uschia sco las fluras auzan era ils chors lur vuschs en nossa emissiun.

Autor: Dominic Pohle

20.03.2023, 16:24

Per blers è quai il temp da ventira. Igl è il temp da colurs, flurs e da la natira che sa dasda. Durant las spassegiadas pon ins guardar brunsinas, mintgilettas, primulas ed anc bler dapli fluras. Accumpagnadas vegnan quellas bellas vistas da las melodias dals utschels ed oz da quellas da «Noss Chors». Imnis a la primavaira ed a las flurs.

Tut sededesta
En fop, sin cresta,
Tut la natira
Puspei respira.
Mirei las pradas
Stupent ornadas,
Schi gaglias, finas
Da flurs carinas!
Sin mintga plonta
L' utschleglia conta,
Sin mintga caglia
Canzuns de vaglia!
O primavera
Cun dultscha tschera,
Seis beinvegnida
Ti benedida!
Savens jeu tratg
Tut contristaus:
O mo sch' il matg
Fuss arrivaus!
Sin tuts ils urs
Sin crests, e fops,
Lur' anfl' ins flurs,
Verdins e pops!
Pertut utschals
Lur ein allerts,
En plauns e valls
Els fan concerts!
Puspei udin
Lur' enzacu
15 Il clom carin:
Cucu, cucu!
A quolm lu mein
Cun ardimen,
E legher stein
Cun grom' e pen:
Savens jeu tratg
Tut contristaus:
O mo sch' il matg
Fuss arrivaus!
Il tschiel sesereina
E bi de smervegl
Terlisch' il solegl;
La tiara terreina
Da neiv e da glatscha,
Che veva satrau
La vall ed il prau
Sin tut la surfatscha.
En fossa zun stgira
Gl' unviern ei satraus;
Per ditg bandischaus
Cun sia puppira,
Ch' a tuts caschunava
Siu freid regiment,
Che fom e sterment
Pertut derasava.
Navent ei la lera
De dis stgirentai;
Tras suffels scaldai
Uss ti, primavera,
Cun forzas celestas
Tier nova vigur,
En nova splendur,
Puspei sededestas.