Hans Lavater vegn or d'ina veglia famiglia da Turitg – in da ses antenats è il plevon Johann Caspar Lavater. Hans è naschì ils 24 da favrer 1885. Suenter il gimnasi ha el frequentà in studi da chemia. En ses temp liber ha el però fatg musica, emprendì da sunar clavazin e cello ed era gia empruvà da cumponer emprimas chanzuns.
La finala è Hans Lavater sa decidì da daventar musicist da professiun. El ha fatg il conservatori a Turitg, tranter auter tar ils magisters Friedrich Hegar, Lothar Kempfer e Carl Attenhofer. Durant il studi ha el era sunà cello en il Tonhalle-Orchester. Per sa perfecziunar – er en diriger – è Lavater stà a Cologna tar Fritz Steinbach, il directur dal conservatori. Il 1911 ha el terminà ses studi ed è returnà a Turitg. Là ha Hans Lavater cumenzà a diriger diversas formaziuns sco il Studentenorchesterverein (1912-1914), il Männerchor Wil (1912-1918) ed il chor baselgia Oberstrass Turitg (1912-1925).
Durant l'emprima guerra mundiala ha Lavater fatg ses servetsch militar cun ses Fiat-Cabriolet sco manischunz dal divisiunari. Hans Lavater è stà in dals emprims possessurs d'auto ed ha era raquintà chaussas intressantas da sias aventuras cun l'auto.
1923 – in onn decisiv
Suenter la guerra ha el surpiglià ils chors virils da Pfäffikon (-1920), Wipkingen (-1923) ed Unterstrass (-1924). Il 1923 è el daventà manader da la Musikakademie Zürich ed ha surpiglià la direcziun dals Zürcher Singstudenten – quai ch'era cumbinà cun il titel «Musikdirektor der Universität». En quest circul è el sa sentì bain ed ha deditgà intginas chanzuns al chor. Il november dal 1923 è el s'annunzià cun success sco manader musical dal Sängerverein Harmonie Zürich, in dals pli gronds e megliers chors virils svizzers. Latiers tutgava er in chor da dunnas. Fin il 1952 ha el dirigì quests chors e realisà ovras grondas sco per exempel «Fausts Verdammung» (Héctor Berlioz), «Ein Deutsches Requiem» (Johannes Brahms) u er «Belsazar» (oratori da Georg Friedrich Händel).
Lavater ed il Grischun
Dal 1932 fin il 1943 ha Hans Lavater era dirigì il chor viril Ligia Grischa ed è da quest chor era dirigent d'onur. Dentant era sco cumponist è Lavater sa profilà. El ha scrit passa 100 chanzuns cun texts tudestgs, franzos ed er rumantschs («Al pur grischun», «Ma chara val», «Ei tucca da notg»). Ses engaschi e sia buna lavur n'èn betg stads senz'attenziun. Gia il 1922 è Lavater daventà commember da la cumissiun da musica da l'Uniun svizra da chors ch'el ha davent il 1933 presidià plirs onns. Ses merits èn vegnids onurads da la citad da Turitg il 1959 cun la medaglia da «Hans Georg Nägeli» e la Harmonie ha creà ina «Hans Lavater-Medaille» per ses commembers d'onur.
Ils 27 d'avrigl 1969 è Hans Lavater mort.
