Avant dus onns ha Mattiu Defuns publitgà cun «Undas» ses emprim album ensemen cun Giganto. Quest atun èsi finalmain temp per ses album da solo. Cun 16 chanzuns sa preschenta il giuven da Trun uss ad in vast public. Sin la platta chattan ins chanzuns gia enconuschentas sco «Mia olma» u «Bi sco adina» sco era las singles novas «Musica» e «Mary». L'ultima ensemen cun Lou Zarra ch'è ina da quatter collavuraziuns. Nus avain ina giada tadlà e prendì ora sis ivettas:
«Mia fantasia» Laschar liber l'atgna fantasia e betg laschar restrenscher è il tema tar quella chanzun. Mattiu na lascha er betg gugent bloccar tras rituals spezials u uras specificas per scriver sias atgnas chanzuns.
«Vallada» Ina chanzun per sia patria la Cadi. El s'identifitgescha fitg cun ses dachasa e cun sia lingua materna. Ord quest motiv ha el registrà la chanzun cun kontra.cant, in chor indigen.
«Ti» Ina chanzun d'amur cun schlantsch che exprima cun pleds simpels ed in chorus che fa endament soap operas ed ils sentiments per la giuvna charezzada. Medemamain ina chanzun ch'è sa midada fitg en il decurs da las registraziuns.
«Musica» L'omagi a la chaussa che stat en il center da la vita da Mattiu Defuns. Sco en bleras chanzuns audan ins er qua sias soras che chantan background. Quai betg sulet pervia da lur bellas vuschs mabain perquai che la famiglia è in ulteriur punct central en sia vita.
«Vesas?» In toc emoziunal scrit dal bab da Mattiu per sia onda che aveva pers sia vesida ed è morta pli tard. Fitg datiers da l'original ma cun ina buna presa Mattiu Defuns. Ina da las favuritas dal chantadur sez.
«Under the Same Old Tree» Ina da las paucas chanzuns che n'è betg scritta sulettamain da Mattiu Defuns. Ensemen cun songwriters ha Mattiu scrit quella chanzun per sa participar al Eurovision Song Contest. El è bain betg vegnì en il final, dentant en ils radios svizzers. Ed il video tiers è tenor mai in dals bels da quest onn.
Quaidas da tadlar era tschellas chanzuns da l'album? Qua sut en la playlist chattais dapli: