Live tar RTR - «Me+Marie» publitgescha lur album da debut

Roland Vögtli – fitg enconuschent tar nus sco Cha da Fö, e Maria Moling – ina da las trais chantaduras da «Ganes», han prendì ina decisiun fundamentala per lur vita communabla: Els vulan far ensemen musica e quai sco «Me+Marie». Dentant na vulan els betg metter il fundament per il cumenzament da lur via musicala communabla en Svizra, mabain els vulan directamain cumenzar en Germania. Uschia ha Roland bandunà sia charezzada patria ed è sa rendì a Minca tar Maria. Lezza aveva gia fatg quest pass avant bun 10 onns, nua ch’ella aveva bandunà sia «Val Badia» envers la gronda Germania.

Ensemen han els lura cumenzà a scriver chanzuns, han sviluppà lur sound ed èn sa collià pli e pli tar ina gronda e fantastica unitad. Cun bler potenzial e gronda simpatia ha la tschertga e las contractivas cun differents labels e promoturs cumenzà. I para che lur musica para gist da tutgar ina noda naira, pertge tuttenina èn s’avertas pliras portas cun differentas opziuns per ils dus «interrumantschs». Gronds nums e producents s’interessavan per quest interessant project. Uschia n’ha quai betg cuzzà ditg e las emprimas registraziuns da studio han gì lieu.

Ina «Live-band» sco ch'i tutga

Roland Scandella e Maria de Val – uschia ils nums d’artist ch’els han surprendì – n’èn dentant betg in project che tutga en il studio. Els dovran in'energia, in'aura tut speziala. Spert è era sa constituì ch’els èn ina «Live-band» sco ch'i tutga. Uschia han els era tschertgà vias e soluziuns extraordinarias per registrar e sviluppar vinavant lur cumposiziuns, per gronda part en ina chamona da guaud en la Baviera.

Entras lur label german «Blankomusik» han lura bain spert era ils emprims engaschaments per concerts cumenzà. Ed insatge ston ins savair: «Me+Marie» èn ina bumba sin il palc! Cun lur intensiva colliaziun persunala creeschan els ina energia ed atmosfera singulara che dumogna da tschiffar in e scadin en ils locals e las salas da concert.

Caracteristica da Me+Marie

Roland e Maria èn musicists fitg multifars, i na dat tar els nagin instrument sin il palc ch’els na sunan betg sez. Nagins trics, nagina musica playback, quai che vegn ord ils autpledaders vegn dad els.

Per vegnir da realisar lur sound giavischà sin il palc han els cumplettà lur pachet live cun in ulteriur musicist: Il bavarais Tom Wörndl – in musicist precis uschè multifar sco els sez.

La glista da concerts conferma quest fatg: Els charreschan dal sid da la Germania enfin en il nord e puspè enavos. Da concert tar concert. Ed era en Svizra èn els pli e pli dumandads, ils termins s’augmentan rapid.

Dapli

Lur perfecziunissem e la visiun da lur finamira èn fitg marcants. Quai ensemen cun l’entir pachet da producents, label, promoziun e tut quai ch’i dovra para da chaschunar in pachet perfetg. La communitad da fans crescha ad in crescher ed ils musicists dastgan siemiar vinavant d’in success musical e da pudair viver vinavant da lur passiun – la musica.

Per tut quels che spetgan gia vess: Nudai ils 6 da matg en l’agenda. Lura pon ins empustar l’album nov. E tgi che vul ina giada sentir «Me+Marie» live: Faschai in sguard sin lur chalender d’occurrenzas sin la pagina d’internet.

Chantà en il studio dal Radio Rumantsch