Era quest onn sa rimnan entusiastas ed entusiasts da musica (e dal far festa) enta Degen per la 38avla ediziun da l’Open Air Lumnezia. RTR rapportescha era quest onn furma d’in liveticker cun tut quai che curra e passa. Ils concerts pudais guardar live en il webstream ubain curt suenter sin Play RTR.
Il Line-Up da l'Open Air Lumnezia 2024 en detagl
Stubete Gäng
Musica populara moderna u musica da pop cun instruments da la musica populara? I n’è betg uschè simpel da descriver il stil da la gruppa svizra Stubete Gäng. Ils musicists da Hagendornen il chantun Zug numnan lur stil «Örbn Ländler» – saut popular da la citad...
Querbeat
Cun els vegn la tribuna pulit plaina: Querbeat da Bonn sa cumpona da 13 persunas ed è ina band che fa «Brass Pop» – Musica da sturs cumbinada cun musica da pop. Dapi 2022 organiseschan els lur agen pitschen festival a Bonn cun il num «Randale & Freunde Festival».
Swiss und die Andern
Auter che quai ch’il num lascha spetgar n’è quai betg ina gruppa Svizra mabain ina band da punk da la Germania. Il chantadur da la gruppa sa numna Swiss perquai ch’el ha ragischs en Svizra.
Rapture Boy
Il 2020 aveva Rapture Boy gudagnà il bandXost l'onn 2020. Dapi lura ha il musicist cun ragischs en l’Africa dal sid gia publitgà pliras singles ed ina EP.
Paul Palud
Il chantadur dal Appenzell Dadora aveva medemamain gudagnà quella concurrenza, numnadamain il 2023. El ha ragischs a Berlin e fa musica ruassaivla per tudestg da scrittira. Dapi ch'el è sis onns suna el clavazin ed è dapi lura vegnì scolà classicamain.
ANIKK
La giuvna chantaudura rumantscha che ha tranter auter publitgà il 50avel Top Pop Rumantsch «Tgi eis ti?». L’onn 2021 è ella stada en il final dal bandXost – ina concurrenza per acts giuvens da la Svizra orientala.
Kontra K
Cun bun 4,8 milliuns portatuns vendids è il rapper «Kontra K» in dals etablì da la Germania. El ha cumenzà sia carriera en il duo da rap «Vollkontakt» ch’è dentant ì dapart be dus onns pli tard. Ses album da debut sco artist da solo ha el publitgà il 2012 – emprims success ha el dentant pir gì suenter pliras publicaziuns cun ses quart album «Aus dem Schatten ins Licht». Cun quel è el per l’emprima giada sa tschentà sin il podest da la parada da hits tudestga.
Alle Farben
Sco emprim in rapper da Berlin e sco proxim in DJ: «Alle Farben» alias Frans Zimmer. Ses emprim hit ha el gì avant bun 10 onns cun «She Moves (Far Away)». Cun quella chanzun ha el cuntanschì en Germania il status da platin (dapli che 300’000 portatuns vendì). 2018 ha el collavurà cun la Svizra Stefanie Heinzmann e ses hit «Build a House» – da quella datti dal reminent era in versiun (per part) rumantscha.
01099
Il segund act da rap tudestg per il festival a Degen. 01099 (pronunzià Null-Zehn-Neunundneunzig) derivan da Dresden e fan dapi 2018 ensemen musica. Ils commembers Gustav, Zachi, Paul e Dani enconuschan per part gia dapi la sablunera. Lur num in pau scurril deriva dal numer postal da la citad Neustadt-Dresden. Emprims hits dad els èn «Frisch» ubain «Durstlöscher». Qua pon ins emprender d'enconuscher la gruppa tar ina scuntrada cun ils moderaturs da SRF Bounce.
Rooftop Sailors
Ils mariners dal tetg chasa sa numnan uschia perquai che la giuvna band da Thun saja vid planegiar sur ils tetgs dal mund ed els raquintian da las chaussas ch’els audian e vesian uschia. Lur musica sauta tranter alternative-rock e pop da ghitarras e vegn numnada da la gruppa sezza «Swagger-Rock».
La gruppa da Thun vegn enstagl da la gruppa da punk englaisa Frank Carter & The Rattlesnakes. Quella midada han ils organisaturs communitgà mez fanadur.
EAZ
È in rapper svizzer cun ragischs cosovaras. Arber Rama, sco che EAZ ha num civil, è da Wetzikon ed ha publitgà l’onn 2015 sia emprima EP. Tar la chanzun «MakeSome Money» dal rapper american SnoopDogg è EAZ d’udir.
Seraina Telli
La finiziun da l’emprima transcha dal Line-Up 2024 da l’OpenAir Lumnezia fa la rockadura Seraina Telli. La chantadura da l’Argovia ha cun sia emprima band Burning Witches gia fatg turneas tras l’Europa ed è dapi 2019 solo da viadi.
Okto Vulgaris
Las «vulps veglias» da Cuira ubain ils pirats dal rock sco Okto Vulgaris sa numnan gugent sez. Els stattan per rock plain energia cun la vusch caracteristica da la chantadura Sarah Mark.
Faithless Live
Maxi Jazz, Sister Bliss e Rollo èn respectiv èn stads ils chaus davos la band Britannica Faithless. Tranter 1995 e 2011 ha la band fatg ensemen musica. Lur ultim album han els publitgà 2020. Lura dentant gia senza il chantadur Maxi Jazz ch’è morts l’onn 2022.
Tream
... ha per propi num Timo Grabinger. Da Timo deriva era il «T» en il num. La segunda part deriva dal pled engles per siemi «Dream» – ses num d’artist stat perquai per «Timos Traum». Quai siemi è da far musica en in stil, ch’i haja (tenor el) uschia anc mai dà: Rap da schlagher.
Tones and I
Il hit da stad 2019 «Dance Monkey» han segir anc blers en l’ureglia. Cun quel ha la giuvna chantadura da l’Australia Tones and I fatg il pass en las paradas da hits sin l’entir mund. Dapi lura ha ella publitgà in album ed ina EP ed è stada sin turnea enturn il mund. Sia single actuala «The Greatest» era la chanzun uffiziala da las “Matildas” l’equipa naziunala da ballape da dunnas.
Enter Shikari
Dapi 2003 fan Roughton “Rou” Reynolds, Chris «Batty C» Batten, Liam «Rory» Clewlow e Rob Rolfe ensemen musica. Dapi lu ha la band englaisa publitgà set albums – l’ultim il 2023 cun «A Kiss for the Whole World».
DANA
La chantadura Dana da Bienna ha 26 onns ed ha gia baud sa decis da metter tut sin la carta musica. Gidaivel era qua segir ch’ella è creschida si en in dachasa musical cun tut quai ch’ina chantadura dovra. Sper sia carriera da solo chanta ella sco Backing-chantadura e dat lecziuns da chant.
Valentino Vivace
Il giuven tessinais Valentino Vivace è creschì si sin in bain da vignas, ha studegià musica a Losanna ed abitescha uss a Turitg. Uschè maschadà sco ses domicils è era ses stil da musica. Ina maschaida da italo-disco cun pop electronic che fa endament vacanzas da stad, in cornet e la splagia.
Gigi
Pir dapi paucs onns è la rappadra Gigi activa en la scena dal Hip Hop svizra. En quai temp ha ella dentant gia gì grond success ed empermetta bler per il futur. Il 2023 è ella tranter auter stada sin tribuna dal Big Air Cuira sco era en nossa LateLounge Hip Hop.
Crown
... da Gonten en il chantun Appenzell Dadens han cumenzà cun covers e fan musica che regorda vid ils onns 60 e 70. Il 2023 èn els daventads segunds al bandXost be davos Paul Palud.
