La populara dad oz deditgain nus a Hans Niederdorfer, clarinettist e cumponist da la chapella Via Mala. El è naschì 1938 e mort als 23 da fanadur dal 2016 cun 78 onns. El è sta in grond promotur da la musica populara, è sta editur da notas ed ha cumponì var 1000 sauts che vegnan anc adina sunads da chapellas da tut la Svizra. Il 1997 ha el survegnì la clav da violina d’aur, la pli gronda distincziun da la musica populara.
Uss è cumparì in disc cun 24 da sias pli bellas melodias, in disc cun ses semperverds e tocs fitg enconuschents, sco la marcha «Surselva», il schottisch «Enorm in Form», il ländler «Bergfeuer» ubain il valser «Für d’Heimwehbündner».