«Oesch’s die Dritten», quai è ina dinastia musicala cun gronda tradiziun. Gia lur tat Hans era in musicant da vaglia ed er Hansueli Oesch, il bab ha sunà en diversas furmaziuns, uschia er tar la chapella «Schwyzerörgeliquartett Stockhorn». Uss è lur chapella da famiglia en il center, e quai già dapi 25 onns. Da la partida èn Hansueli ed Annemarie, lur uffants Kevin, Mike e Melanie e l’accordeonist Urs Meier.
Lur furmaziun è ina da las pli popularas en Svizra ed ha er success en l'Austria ed en Germania ed els han fatg passa 1'700 concerts en 14 pajais ed han ramassà discs d’aur e platin per la vendita da lur albums.
«Oeschs die Dritten», quai era l’emprim ina furmaziun cun ils uffants che faschevan musica e chantavan è che fascinavan il public. Il 2007 han els gì lur emprim grond success cun il disc «Jodelzauber» – e cun il «Ku-Ku Jodel» datti in onn pli tard in semperverd ch’ins enconuscha anc adina. La furmaziun da famiglia è lura stada giast en emissiuns da radio e televisiun sco il «Musikantenstadl», e lur popularitad crescha, surtut er pervi da Melanie Oesch che chanta e jodlescha.
Uss è cumparì lur disc da giubileium «25 Jahre Oesch’s die Dritten – Es Fescht» che cuntegn puspè blera musica populara cun orgelet, bler schlantsch, chant e divertiment.