Giubileums gronds na datti betg mintg'onn da festivar. RTR lascha dentant resunar oz en l'instrumentala musicas cun anniversaris da 130, 110 e 100 onns.
Las pli giuvnas musicas en l'emissiun èn la Societad da musica Andiast e la Musikgesellschaft Madrisa Klosters Dorf. Ellas festiveschan lur giubileum different. Andiast en rama mudesta e Claustra organisescha la Festa districtuala e sa regala ina nova bandiera da l'uniun.
La musica Union Chur po festivar quest onn ses giubileum da 110 onns. Cler, betg in dumber ch'ins sto far gronda festa. Tuttina gratulain nus e laschain sunar la musica dus tocs.
Las duas veglias musicas en l'instrumentala èn la Musikgesellschaft Concordia Filisur e la Musikgesellschaft Arosa. Omaduas han 130 onns. Da la musica da Filisur avain pauc en noss archiv e da la musica d'Arosa insumma naginas registraziuns. Persuenter avain ina registraziun dal 1996 cun il Festival Blasorchester Arosa.
In pitschen giubileum ha era la Jugendmusik Domat/Ems. Quella avess quest onn 60 onns ha dentant midà il num per schlargiar il circul da musicantas e musicants giuvens. Ussa sanumna ella «Jugend Brass Band Imboden».
Bun divertiment cun l'instrumentala d'anniversaris.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.