Tge capita, sche persunas da la Svizra tudestga, dal Tessin, da la Svizra franzosa e da la Svizra rumantscha sa scuntran? Logic: ellas discurran englais. Ed er cler: mintgina e mintgin è da l’avis che sia atgna regiun linguistica saja la meglra. En tschintg episodas da «Fight 4 Flags» va mintgamai ina gruppa per regiun linguistica cun persunas pli u main enconuschentas en ina sort da champ da classa explosiv.
Da gudagnar datti: nagut! Cun excepziun dal dretg da pudair sa far da grond u gronda envers l’equipa victorisada. E cunquai che tuts han tuttina da perder insatge cupitga l’ambiziun en scuidanza ed il spiert sportiv en ina guerra psicologica.
Quai èn ils teams regiunals
La Svizra rumantscha vegn represchentada dal moderatur RTR e musicist Elias Tsoutsaios, da la podcastra Eva Gaudenz, dal gamer e ballapedist Joris Tomaschett e da la curridra Valeria Cavelti.
Per la Svizra tudestga cumbattan: il blagunz e chau furius a temp parzial Mateo Gudenrath, l’utensil multifuncziunal da content Alina Redzic, il comedian schenial Ramin Yousofzai e la moderatura da Radio SRF-Virus Mira Bella Weingart.
La gruppetta legra tessinaisa sa cumpona da l’influenzra Elisabeth Giglio, il chantadur Renato Torre, la stailetta da social media Giulia Negro ed il musicist Michelangelo Cavadini.
Per il team da la Svizra romanda èn al start: l’illustratura Nida Ajmi, il sautunz e comedian Jamie Kallon, la coacha da sport Catherine Ambrey ed il content creator Georges Fournier.
![L'entir team da Fight 4 Flags davant e davos la camera.](https://www.rtr.ch/static/cms/images/960w/7b0897.jpg)