El saja bain in zic dischillusiunà, perquai ch'el aveva sperà sin in plaz tranter ils megliers 10. Ma la finamira saja stada da vegnir en il final e quai haja el dumagnà. Ultra da quai saja el fitg cuntent cun sia preschentaziun. El haja giudì l'experientscha ch'el haja pudì far al ESC. Remo Forrer ha survegnì 31 puncts dal public, ensemen cun ils puncts da la giuria ha el fatg total 92 puncts per la Svizra. La chantadura Loreen che ha gudagnà ha fatg total 583 puncts per la Svezia.
La svedaisa ha gudagnà il ESC: gia il 2012 en l'Aserbaidschan aveva ella gudagnà cun la chanzun «Euphoria».
Remo Forrer è ì per la Svizra al ESC ed ha cuntaschì cun sia ballada «Watergun» il 20avel plaz. Il giuven da 21 onns è tuttina anc stà avant la Slovenia, l’Albania, il Portugal, la Serbia, il Reginavel Unì e la Germania. Davart la victoria da Loreen di el «Well deserved», ella haja fatg ina buna show. Il plaz dus ha fatg Käärijä per la Finlanda ed il terz plaz ha fatg Noa Kirel per l'Israel.
Remo Forrer en il final a Liverpool
Las ultimas trais ediziuns ha la Svizra mintga giada cuntanschì il final da l’Eurovision Song Contest. Ed er il giuven da Son Gagl ha dumagnà questa finamira. Cun Luca Hänni ha ina curta seria da success cumenzà. Il chantadur bernais ha cuntanschì a l’ESC 2019 cun «She Got Me» il quart plaz. Suenter la pausa sfurzada il 2020 ha Gjon’s Tears schizunt fatg il pass sin il podest. Per sia chanzun «Tout l’Univers» hai dà il terz plaz.
Per l’ultima ediziun a Turin è Marius Bear sa participà. El ha cuntanschì il final, là hai dentant be dà il 17avel plaz da 26.
Cun Remo Forrer ha la Svizra puspè tschernì in giuven talent. Cun be 21 onns ha il chantadur da Son Gagl dentant gia rimnà experientschas durant emissiuns da televisiun. Uschia ha el gudagnà il 2020 «The Voice of Switzerland» e 2022 l’emissiun tudestga «Zeig uns deine Stimme». Cun quai ha el rimnà bain inqual fan en Germania ed emprendì co ir enturn cun la tema avant ir sin tribuna.
Jau ignoresch las cameras ed emprov da betg pensar tge che stat davos quellas.
La concurrenza en il final
26 artistas ed artists fan part dal final da l’Eurovision Song Contest 2023 a Liverpool. I ha dà musica da tut ils geners, preschentaziuns minimalistas, finas fin tar bumbasticas cun effects spezials e costums anc pli spezials. Loreen cun «Tattoo» è davent da l'entschatta stada favorita. La chantadura da Svezia ha gia il 2012 gudagnà cun la chanzun «Euphoria» ch’ha anc oz success. Er Il finlandais Käärijä è sta cun sia chanzun «Cha cha cha» in favurit. Sco rapper è el stà in exot sin la tribuna da l’ESC ed ha provocà in pau cun ils costums e la show. Quai stgandelisar ha para dentant betg plaschì a tuts.
Grond public e nov sistem da votar
L’onn 2022 ha la gruppa ucranaisa «Kalush Orchestra» gudagnà ed avess perquai d’organisar l’ediziun dal 2023. Pervia da la guerra è dentant l’Engalterra vegnida tschernida sco cunorganisatura e Liverpool sco lieu d’occurrenza. Sco mintg’onn han radund 160 milliuns aspectaturas ed aspectaturspersequità l'occurenza da musica europeica.
Da nov ha il public giugà ina pli impurtanta rolla per ils mezfinals. Normalmain ha il public ed ina giuria dal fatg mintgamai decidì ensemen tgi che va en il final. Per ils mezfinals da l’ediziun 2023 ha decidì sulettamain il public. Pir en il final ha la giuria dastgà puspè dar giu sia vusch.
