Mintg’onn festiveschan RTR e la SRG la musica svizra. Quai faschain nus cun emetter 24 uras be musica d’artistas ed artists svizzers. Normalmain dat quai durant quels dis era osps che sunan live en ils studios da RTR, SRF, RTS ed RSI. Perquai che quai n’è anc betg pussibel avain nus enstagl preparà tschintg concerts da musicistas e musicists svizzers che nus avain registrà ils ultims trais onns.
«Pascal Gamboni e la combo crassira» al Rock Sedrun 2018
Aposta per il Rock Sedrun 2018 han ils musicists rumantschs Dario Hess, Rees Coray, Severin Brugger, Dario Jemmi, Flavian Krol e Pascal Gamboni fundà la «Combo crassira». La band che ha gì il 2018 lur emprim concert e ch’i dat be en furma live ha sunà oravant tut chanzuns originalas da Pascal Gamboni e Dario Hess.
«Black Sea Dahu» a l’Open Air Sur L’aua 2018
Oz valan els sco in dals gronds exports svizzers da la musica dad indie e folk. Avant trais onns han els dentant anc sunà in pign ed intim concert a l’Open Air Sur L’aua. Ils fragliuns Janine, Vera e Simon Cathrein fan musica ensemen cun Paul Märki, Nick Furrer e Ramon Ziegler. Ensemen creeschan els durant lur concerts in agen mund musical cun in’atmosfera tut speziala.
«Me & Marie» al Rock Sedrun 2018
L’onn 2018 è stà l’onn dal duo «Me & Marie». Maria de Val e Roland Scandella che avevan gist publitgà lur segund album «Double Purpose», èn daventads il «SRF 3 best talent» ed han gì concerts en Svizra, Germania e l’Austria. Oz na datti quest duo deplorablamain betg pli, perquai po in u l'autra forsa era daventar in zic nostalgic cun tadlar lur concert dal 2018 al Rock Sedrun.
«James Gruntz» al Festival da Jazz a Son Murezzan il 2019
Il chantautur da Basilea conuschan ins oravant tut dals radios svizzers. Sias chanzuns da pop han blers anc en l’ureglia. Pli paucs san dentant ch’el ha fatg in master a la scola da jazz a Turitg. Ch’el sa senta era bain en quai mund ha el demussà durant il festival da Jazz a Son Murezzan il 2019.
«Martina Linn» e ses concert a Segl il 2020
Il 2020 n’hai betg dà bler per ils fans da la musica live, da concerts e festivals. In’excepziun era il concert da Martina Linn l’october 2020 a Segl. Là ha ella chantà da sias trais fasas musicalas. Da l’entschatta cun musica populara rumantscha, da sia fasa cun musica da folk e cun musica da ses album actual «Win What Yesterday Lost» en il stil da musica americana.
