Suenter ils emprims pass sco rapper sin l’album «G-Punct», collavuraziuns cun Mattiu Defuns, e proxims pass sco artist da solo sin «Sault d’amur» fin l’EP dubla dal 2023 «L’alva nera» ha Giganto adina puspè demussà differentas fassettas. Las emprimas chanzuns eran per part pli provocativas cun diversas collavuraziuns. Pli tard hai dà chanzuns en direcziun pop, pli adattadas per famiglias (per exempel «Mumma» cun Mattiu Defuns). Cun il segund album da solo «Sault d’amur» è era la provocaziun turnada – chanzuns sco «Tgil blut» han procurà per lingias grassas era sur cunfins grischuns ora. Cun l'EP dubla «L’alva nera» è Giganto daventà in zic pli modern e creschì.
Quai cuntinuescha uss era sin l’EP actuala «Berlin&Retour». Per producir quella ha el collavurà cun il producent Jan Pinggera ch’è oriundamain da Scuol ed abitescha e lavura ussa a Berlin. Musicalmain sa preschenta la platta anc pli electronica - per part cun beats pulsonds che fan endament musica da tecno. Per franc è quai er influenzà da la citad Berlin che vala betg be sco in Mekka dal tecno mabain ch’è er ina citad che dorma mai.
Temas e musica sco i plascha
«Berlin&Retour» saja in project naschì senza squitsch commerzial e cun musica che duaja cunzunt plaschair a Giganto sez. Era tematicamain tracta il rapper patratgs ch'han fatschentà el durant ses temp en la chapitala tudestga: Consum, relaziuns, festas, amur, differentas culturas ed ils sentiments fraids en citads grondas.
Pli baud èn blers rumantschs e bleras rumantschas – sfurzadamain u da libra veglia – sa mess sin viadi ed èn turnads cun novas ideas musicalas. Era Giganto è turnads cun ideas frestgas e tiers in stil nov, electronic e modern. I saja plitost musica per amaturs da musica cun plaschair d'experiments. Tuttina reflecteschan las chanzuns musicalmain ina tendenza en la scena da rap da la Germania. Il cuntegn elavura las experientschas dal rapper e tematicas actualas. Sche «G-Punct» era anc il scolaret cun ideas balurdas, plain colurs e senza gronds quittads lura è «Berlin&Retour» il student – pli madirs, pli clers ma forsa er in zic pli pauc veglia da giugar. Mantegnì ha el sia moda da scriver cun flows e remas simplas.
