Cunquai ch'ina da las grondas favuritas e victura da record cun 14 titels manca quest onn, vegni in zic pli simpel per las autras bands. Era cun l'absenza da la BB Treize Étoiles hai tuttina duvrà ina buna prestaziun tant en il toc da patg sco er en il toc da pensum. E la Valaisia Brass Band cun il dirigent Arsène Duc ha salvà il titel en il Vallais. Bunas schanzas per il titel (sco quasi mintg'onn) avessan er gì la Brass Band Berner Oberland (sis victorias) e la Brassband Bürgermusik Luzern (set victorias). Ma er tut las autras bands han bunas schanzas sche la furma dal di e la prestaziun il mument da la preschentaziun persvada la giuria. Lezza sa cumpona quest onn dals Svizzers Carlo Balmelli, Pascal Eicher e Blaise Héritier, sco era dals Englais Robert Childs e Howard Lorriman.
Glista da rangaziun
| Furmaziun | dirigent | pensum | patg | total |
| 1. Valaisia Brass Band | Arsène Duc | 178 | 169 | 347 |
| 2. Brassband Bürgermusik Luzern | Michael Bach | 167 | 175 | 342 |
| 3. Brass Band Fribourg | Florent Didier | 175 | 164 | 339 |
| 4. Liberty Brass Band Ostschweiz | Stefan Roth | 171 | 163 | 334 |
| 5. Ensemble de Cuivres Valaisan | Jean-François Bobillier | 161 | 172 | 333 |
| 6. Wallberg Band | Ivan Meylemans | 162 | 170 | 332 |
| 7. Brass Band Berneroberland | Véronique Gyger-Pitteloud | 158 | 170 | 328 |
| 8. Ensemble de Cuivre Jurassien | Russel Gray | 168 | 155 | 323 |
| 9. Oberaargauer Brass Band | Hervé Grélat | 154 | 156 | 310 |
| 10. Brass Band Luzern Land | Sandro Blank | 158 | 151 | 309 |
La band victura survegn bons da 5'000.- francs per cumprar instruments u musicalias. La band sin plazza dus survegn bons en ina valita da 3'000.- francs e la terza survegn bons en ina valita da 2'000.- francs.
Il premi spezial per il meglier solo d'eufoni en il toc da pensum (500.- fr.) va a Glenn van Looy da la Valaisia Brass Band ed il premi spezial da 1'000 francs per avair sunà il meglier il toc da patg va a la BML, la Brassband Bürgermusik Luzern.
Masquerade sco toc da pensum
Il toc da pensum da quest onn sa numna «Masquerade» da Philip Wilby. La primaudiziun da quest toc è stada ils 4 da settember 1993 a Manchester a chaschun dals British Open Championships. Wilby descriva l'ovra sco omagi al 100avel di commemorativ da l'ultima opera da Giuseppe Verdi «Falstaff» (primaudiziun 1893). Il libret d'Arrigo Boito sa basa sin la cumedia da William Shakespeare «Die lustigen Weiber von Windsor».
L'opera finescha cun in finale legraivel nua che tut ils caracters suttastritgan la morala che la vita saja ina cumedia. Philip Wilby prenda la scena finala da l'opera sco basa per sia cumposiziun. El ha prendì ina part da la musica da Verdi ed ina part da l'acziun da Shakespeare e tessì quai en ina taila da musica autamain pretensiusa.
L'ovra «Masquerade» cumenza la notg en il grond parc da Windsor nua che las dunnas han carmalà Falstaff cun faussas empermischuns. Las conspiradras ed ils conspiraders ch'èn vestgids sin differenta moda s'inscuntran en il parc e spetgan l'arrivada da Falstaff. Il misterius da questa mascarada e la tema da Falstaff è d'udir entras ils tuns dals divers registers da la Brass Band. En l'opera vegn la rolla da Falstaff chantada d'in bariton ed uschia surpiglia en la Brass Band l'eufoni questa part. La lunga cadenza d'eufoni (il meglier solo d'eufoni vegn onurà quest onn cun in premi spezial) descriva l'agir avant mesanotg. Falstaff observa or dal zuppà sco Nanetta (ina da las dunnas mascradas) chanta in solo (sunà dal principal-cornet) entant che la glina cumpara sur las plantas. Tuttenina tschiffan las autras persunas Falstaff ord ses zup. Sco tar il giugar a tschiffar (Blindekuhspiel) vegn Falstaff chatschà enturn set giadas fin ch'el enconuscha la finala ses anteriurs amis. Questas set giadas far ir enturn mussa Wilby cun accellerandos e cun in finale frestg chavalchescha l'ovra envers sia fin.
Classichers sco tocs da patg
Per gudagnar la concurrenza dovri suenter ina fitg buna prestaziun en il toc da pensum ina segunda ferma preschentaziun il suentermezdi en il toc da patg. Danovamain han las bands partizipantas pudì eleger in toc or d'ina glista prescritta da classichers da brass band. Mintgamai trais tocs derivan da Peter Graham e Philip Sparke. Quai cumprova quant populars ch'ils dus cumponists èn. L'auditori ha pudì giudair ovras sco per exempel «Blitz» (Derek Bourgeois), «Montage» (Peter Graham), «Dances And Arias» (Edward Gregson) u «The Year Of The Dragon» (Philip Sparke).
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.