Arno Jehli è naschì ils 30 da mars 1950 a Seglias. Gia baud ha el chattà il plaschair vi da la musica e sia mamma ha perquai cumprà per el in accordeon. Quel ha el cumenzà a sunar l'emprim a moda autodidacta cun sunar suenter ils schlaghers ch'el ha udì. Tuttina ha el vulì prender uras da musica, en spezial per emprender da leger notas. El n'ha dentant betg gì ditg instrucziun, sco el raquinta.
Uschia ha el vinavant sunà stediamain a chasa, senza magister. Da leger notas n'ha el lura mai emprendì, quai n'impedescha dentant betg el da cumponer. Fin oz ha el scrit passa 500 ovras per musica populara ed er autras furmaziuns. Il 1968 ha el confundà la chapella Oberalp. Questa furmaziun suna cun duas (magari trais) clarinettas (Josias Just, Martin Tanner e Walter Rogentin) dus orgelins (Kurt Patzen ed Arno Jehli) ed in giun (Ernst Mark). Bleras midadas n'han els betg gì e la colleghialitad saja fitg buna, di Jehli.
Cun «sia» chapella suna el uss gia passa 50 onns ed il gust da far musica, sunar orgelin (u er accordeon) sco era cumponer è anc adina grond.
Bler sin viadi
Cun la chapella Oberalp ha Arno Jehli gia fatg massa viadis sin l'entir mund. Avant decennis, sin in viadi a Toronto ha el emprendì d'enconuscher ina Steel-Band. Quai è stà insatge nov per el.
Uschia è quai bunamain daventà ina spezialitad da la chapella Oberalp. Adina puspè han els sunà ensemen cun las pli diversas furmaziuns d'auters geners da musica, per exempel musica sidamericana, rap, rock, classic u er tecno. Els tgiran però er vinavant il stil tradiziunal da musica populara.
Era per ses anniversari da 75 onns vegn organisà in viadi spezial, in viadi sin il flum Seine da Paris a Le Havre ed enavos. La chapella Oberalp accumpogna il viadi cun sia musica. E ses natalizi n'è per el nagin motiv da chalar.
Sco ch'i para mantegn far musica giuven. Arno Jehli vul cuntinuar cun sunar e cumponer almain uscheditg che la sanadad lascha tiers.
