Rapsodias èn en il mund da la musica ovras ch'èn en stil e furma detg libras, savens en in singul moviment e fitg datiers a la fantasia. Savens derivan ils temas ed ils motivs da la musica populara. En l'Artg musica datti rapsodias africanas.
Il musicist Seckou Keita è oriund dal Senegal ed è in maister da sunar la cora. Cora è in'arpa da l'Africa occidentala che sumeglia in zic ina ghitarra ha dentant in corpus radund che vegn fatg ord ina mesa callabassa, in fretg ch'ins na po betg mangiar. Per sunar ses'ins sin ina sutga, la cora è tschentada davant sin ina sort taburet ed il culiez da l'instrument è drizzà ensi, las cordas envers il sunadur. La cora vegn sunada cun omadus mauns ed è derasada en spezial en Guinea, Senegal e Gambia.
Il pli savens sa preschenta Seckou Keita sco solist, sco sunadur da cora. El è dentant er cumponist, chantadur e percussiunist ed ha gia publitgà 12 albums. Per il disc cumpact «African Rhapsodies» ha el dentant collavurà cun il BBC Concert Orchestra, in orchester sinfonic sut la direcziun da Mark Heron.
Il 2019 è Keita vegnì onurà sco «musicist da l'onn» al BBC Folk Music Award.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.