En quest inscunter cun quatter dals megliers percussiunists da l’Europa dal Nord pudais vus tadlar in concert musical unic. L’experientscha da tuns fantastics e dal plaschair da sunar magic tutga tut ils nivels. Ils quatter musicists dattan il meglier e furneschan in program captivant, subtil e multifar. Sut il focus sin la percussiun melodica porscha il quartet in program ballant, sonor e virtuus.
NPG (Nordic Percussion Group) è in nov ensemble da percussiun fundà e plain forza cun percussiunists da grond renum. Ils commembers èn David Hildebrandt (Danemarc), Johan Bridger (Svezia), Morten Friis (Danemarc) e Patrick Raab (Svezia). Tuts quatter èn musicists / percussiunists da renum mundial ed activs sco interprets, cumponists e magisters.
L'Artg musical emetta in concert dal NPG ch'els han dà ils 10 da mars 2024 a Halmstad en il Kulturhuset Najaden. Il concert è mess a disposiziun da la EBU.
