Naschida a Wattwil, creschida si era en in vitg en il chantun Berna arriva la famiglia Maria e Markus Schmid-Spirig cun lur uffants Maria Riccarda, Marc-Andrea e Florian a Cuira. Lura ha la figlia 10 onns. Oriundamain è la famiglia da Flem. Ils geniturs da Markus Schmid avevan in'ustaria a Glion e suenter che lezza è brischada giu duas giadas en il tat e la tatta da Maria Riccarda sa chasads en la Bassa.
Musica – cuntegn da sia vita
Gia da pitschen ensi è Maria Riccarda circumdada da musica, udiva e tadlava musica populara, schlagher, chanzuns popularas ed operetta. Sco matta ha ella savens improvisà al clavazin, pli tard (a Cuira) ha ella survegnì instrucziun da clavazin. In'emprima impressiun impurtanta da la musica classica ha ella survegnì entras ina platta fonografica che ses geniturs han purtà d'in viadi a Prag, «Slawische Tänze» d'Antonin Dvorak . Ella ha sautà tiers la musica. Sco uffant ha ella adina vulì vegnir sautunza.
Il temp da giuventetgna hai dà adina pli savens inscunters cun la musica classica (p. ex. la messa da h-moll da Bach cun il chor da la Singschule Chur). Ella ha lura era emprendì da sunar violina e pli tard anc viola.
Suenter la matura è Maria Riccarda vegnida sin l'idea sin vias «main gulivas» da chantar professiunalman . A Soloturn ha ella prendì lecziuns da chant tar Hedwig Vonlanthen. Lezza ha però ditg ch'ella saja memia veglia e che Maria Riccarda duai ir a Basilea e s'annunziar tar Kurt Widmer. Lez ha mussà interess e manegià che la giuvna Grischuna duai far l'examen d'admissiun. L'examen è però ì talmain mal che la giuria ha manegià che Maria Riccarda duai plitost ir a chantar en in chor che da vulair far ina carriera sco solista.
Paucs dis suenter il naufragi a l'examen d'admissiun al conservatori ha la figlia da la scolasta da chant Hedwig Vonlanthen telefonà a Wesseling e ditg ch'ella duai ir a Stuttgart, là possia ella chantar avant a Helmuth Rilling, il dirigent da la Gächinger Kantorei. Quai è grategià e Maria Riccarda Wesseling ha lura pudì chantar plirs concerts ed era chantar per registraziuns da plattas fonograficas cun quest chor da renum internaziunal.
Dasper ha ella pudì prender uras da chant a Soloturn (tar Hedwig Vonlanthen) ed ha fatg ses studi da musica a Berna (teoria da musica), Bienna (istoria da musica) e Turitg (scienzia da musica). Il 1995, anc durant il studi, ha ella survegnì si'emprima rolla d'opera (nimfa en l'opera «Ariadne auf Naxos» da Richard Strauss). In onn pli tard è Wesseling vegnida engaschada da l'opera a Lille per la rolla principala en l'opera «La cenerentola» da Gioacchino Rossini.
Anc durant il temp da studi ha Wesseling midà scolasta da chant ed è ida al conservatori da Berna tar Elisabeth Glauser. Curt suenter la midada da Soloturn a Berna ha Maria Riccarda emprendì d'enconuscher en la Frantscha dal sid ses um ollandais Onno Wesseling. Curt suenter avair fatg il «Lehrdiplom» (oz Bachelor) è ella ida ad Amsterdam tar ses futur um ed ha vulì far là il «master» (diplom da solista). Parallel a ses studi ha ella già chantà numerus concerts e la finala ha ella gì tanta lavur ch'ella na betg pudì terminar il master.
Mamma e chantadura
Il 1999 naschà la figlia Maura e davent da lura ha Maria Riccarda Wesseling finanzià la famiglia sco chantadura libra. Cun ses repertori lad po la mezzosopranista chantar sin diversas tribunas en Svizra, Germania, Frantscha, Engalterra, Italia ed Ollanda. Il 1996 ha ella gudagnà il segund premi da la concurrenza da Schumann a Zwickau ed il 2002 il premi Eliette von Karajan. Il 2004 ha ella survegnì il premi da cultura per musica dal chantun Soloturn ed il 2007 ha la citad da Cuira surdà ad ella il premi da renconuschientscha. Il chantun Grischun ha onurà Wesseling l'onn 2014 cun in premi da renconuschientscha.
Dapi il 2022 abitescha Maria Riccarda Wesseling e ses um en il Grischun. En la Tumleastga han els chattà ina chasa da la quala els avevan gia semià pli baud da pudair ina giada abitar en quella.
