Henry Mancini (num da batten Enrico Nicola Mancini) è naschì ils 16 d'avrigl 1924 a Cleveland, Ohio. Ses geniturs Quinto Mancini ed Anna Pece èn emigrads da l'Italia avant l'emprima guerra mundiala en ils Stadis Unids. Il bab amava la musica ed ha animà il sulet uffant d'emprender da sunar flauta e flauta traversa. Cun 12 onns ha Henry lura er emprendì clavazin e suenter la high school ha el frequentà la Juilliard School of Music a New York. Ses grond entusiassem aveva el per la musica da jazz, big band e swing. Ils onns 1940 aveva el bun contact cun Benny Goodmann ed è era stà commember da la Glenn Miller Band.
Ses emprims daners ha il flautist e cumponist gudagnà sco freelancer che ha fatg musica per paucs daners e sunà melodias plain schlantsch a chaschun da festivitads. Ils onns 1950 ha el lavurà per ils Universal Studios ed ha fatg la musica per films da horror, tranter auter per «Tarantula».
Maister d'arranschaments
Suenter ses engaschi tar Universal è el sa sviluppà ad in arranschader da swing e pop chapabel ed è daventà l'ami dal reschissur Blake Edwards. In'amizicia congeniala che ha purtà hits sco «Peter Gunn» ed ils classichers eterns «Moon River» e «Pink Panther». L'entschatta dals onns 1960 ha el lantschà per propi sia carriera. Durant ils proxims decennis è el e sia musica stada nominada 18 giadas per in Oscar. El ha gudagnà quatter. Vitiers ha el survegnì 20 Grammys, in Grammy per si'ovra da vita ed in Golden Globe. Durant sia vita ha el producì 50 albums da musica commerzials.
Maister dal Easy Listening
Mancini vala sco in dals represchentants ils pli populars da l'uschenumnà «Easy Listening», musica lucca, leva ed agila. Mancini aveva in agen stil unic, cun gronda levezza ed ina simpladad e clarezza surprendenta. El era influenzà da musica da swing, jazz e musica da l'America latina, dentant era dals impressiunists franzos Claude Debussy e Maurice Ravel.
Fin sia mort è Mancini stà maridà cun la chantadura Virginia O'Connor. Da lur lètg sortan trais uffants: las schumellinas Monica e Felice ed il figl Christopher. Henry Mancini è mort ils 14 da zercladur 1994 a chasa en consequenza da cancer da pancreas e dal dir.
![](https://il.srgssr.ch/images/?imageUrl=https%3A%2F%2Fdownload-media.srf.ch%2Fworld%2Fimage%2Faudio%2F2020%2F07%2F615d8a03036e462cbee1e3f47b0d67ae.jpg&format=jpg&width=320)
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.