James Horner è naschì ils 14 d'avust 1953 a Los Angeles sco figl da l'immigrant austriac Harry Horner. Ses bab ha lavurà a Hollywood sco scenist ed è vegnì onurà dus giadas cun in Oscar. Paucs onns suenter la naschientscha da James è la famiglia sa chasada a Londra. Là ha James Horner studegià al Royal College of Music. Pli tard ha el midà a l'universitad da Southern California. Atgnamain aveva el quintà da far carriera sco cumponist per musica sinfonica, musica per orchester. Lura han intgins students da film supplitgà el endinadamain per ina cumposiziun. El ha laschà surplidar e quai haja midà tut ha el ditg en in'intervista.
Jau n'aveva mai sfarlattà in patratg a la musica da film. Ma lura è vegnì quest film da students ed jau sun m'inamurà en la musica da film ed hai laschà davos mai la classica.
Emprim success cun Star-Trek II
A la fin dals onns 1970 è James Horner sa deditgà a la musica da film, l'emprim film cun sia musica è stà il 1979 «The Lady in Red». L'emprim grond success ha el pudì festivar il 1982 cun la musica per il segund film da Star-Trek. Il cumponist da la musica per l'emprim film da Star Trek, Jeff Goldsmith, aveva ditg giu sia partizipaziun perquai ch'il preventiv per Star-Trek II è stà bler pli pitschen. Quai è stà la schanza per James Horner. Sia musica per Star Trek II dueva exprimer ina tscherta mentalitad da navigaturs e sa differenziar ferm da l'emprim film. Quai è gartegià a James Horner e davent da lura è sia musica ida da success a success.
Il 1986 ha el scrit la musica per il film «Der Name der Rose» ed igl ha dà las emprimas da 10 nominaziuns dad Oscar per sia musica per il film «Aliens» e la chanzun «Somewhere Out There» or dal film «Feivel, der Mauswanderer». Ulteriuras nominaziuns per Oscars, Golden Globes u Grammys hai dà tranter auter per «Apollo 13» (1995), «Braveheart» (1996), «A Beautiful Mind» (2002) u «Avatar» (2010).
My Heart will go on
Ses dus Oscars e vitiers dus Golden Globes sco er in Grammy ha el gudagnà il 1998 per «Titanic»: per la meglra musica da film e per «My Heart Will Go On» sco meglra chanzun. Ma bunamain n'avessi betg dà questa chanzun. Il reschissur da «Titanic», James Cameron ha refusà chanzuns per ses films. Horner vuleva però che la glieud restia a la fin dal film anc en il kino (durant ch'i vegn mussà ils nums) ed ha patertgà vi dad ina chanzun per crear in'atmosfera persunala, intima. Per che la chanzun haja insumma ina schanza ha il cumponist stuì engianar Cameron.
Jim Cameron na vuleva nagin song, uschia hai jau telefonà dascus a Céline Dion. Ella era entusiasmada. Nus avain registrà ina demo, Jim na saveva nagut.
Il resultat da quest'iniziativa curaschusa: 15 milliuns singles vendidas, trais Grammys, in Oscar ed in Golden Globe ed anc oz tutga «My heart will go on» tranter las 10 chanzuns vendidas il pli bler sin l'entir mund.
L'ultim grond success – «Avatar»
L'ultima nominaziun per in Oscar e per ils Golden Globe ha Horner survegnì per in'ulteriura collavuraziun cun James Cameron: «Avatar – Aufbruch nach Pandora» (2009). Omadus eran vi da lavurar vi d'ina cuntinuaziun cura che James Horner ha pers la vita tragicamain tar la crudada da ses aviun pitschen ils 22 da zercladur 2015.
Durant sia vita ha el scrit la musica per radund 120 films.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.