En l'emissiun datti ina giada musica per ils fans da jazz, melodias da Nadal enconuschentas e tradiziunalas arranschadas per Big Band. Il bandleader Bob Mintzer e la WDR Big Band han mess ensemen in program da concert sut il motto «Jazzy Big Band Christmas».
Igl è in concert ch'il Westdeutscher Rundfunk WDR ha registrà ils 14 da december 2023 en la Philharmonie Essen. Il WDR ha mess a disposiziun quel a la European Broadcasting Union EBU, a la quala er RTR fa part.
La band
La WDR Big Band è l’emprim orchester da jazz da las Big Bands europeicas – ch’è vegnì undrà pliras giadas cun in Grammy per sias producziuns da disc cumpact. Mintga commember da la Big Band da WDR è in solist cun ina colur da tun nunconfundibla che dat gronda attracziun a l’orchester. La Big Band dal WDR è giast mundial e porta sco ambassadur musical il jazz e musica sumeglianta al jazz sin tribuna, en l’aria ed en l’internet.
Il program da la Big Band dal WDR cumpiglia l’entir spectrum da musica da jazz e jazz da tradiziun fin avantgarda. Latiers tutgan er il latin jazz, la world music, la fusiun ed il crossover – fidaivel al motto «Cunfins musicals èn sfidas musicalas». Il medem mument ha la WDR Big Band ina relaziun cun la tradiziun europeica, cunzunt cun il jazz fatg en l'Europa. Quest factur integrativ fa adina part dal concept da program ordvart cumplex, e fa or da la band in motor da jazz vigurus en Germania ed en l’entir mund.
Il bandleader e la chantadura
Bob Mintzer viva en ils Stadis Unids a Los Angeles. El è saxofonist, arranschader e magister da musica. Dapi 30 onns è el era commember dals «Yellowjackets» – ina fusion band americana che suna ina maschaida tranter jazz, rock, pop e latin.
Al concert da la WDR Big Band ad Essen ha era la chantadura Judith Hill collavurà. L’Americana cun l'annada 1984 ha sin sia davosa turnea era fatg fermada en Svizra (a Bienna ed a Losanna). Ella era gia adina circumdada da musica e musicists: sia mamma Michiko è in keyboardista dumandada, ses bab Robert suna bass. Suenter il studi en la California ha ella lavurà tranter auter cun Robbie Williams ed Elton John, ed a partir dal 2007 ha ella vivì per in temp en la Frantscha. Ma il 2009 è ella tuttenina daventada renumada cura ch'ella ha chantà al funeral da Michael Jackson. Er Prince ha remartgà il giuven talent extraordinari, ses album da debut «Back in Time» da l'onn 2015 ha Prince coproducì.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.