Artg musical - Giusep Sialm (1934-1985) – cumponist e dirigent

El ha vivì ed operà per gronda part en la Bassa. E tuttina: sia patria grischuna e rumantscha ha el mai emblidà. Da quai dattan era intginas da sias cumposiziuns perditga: Pictura, Retsina 2000, Quo vadis (rumantschia)? Ed ils marschs: Mistralia, Rätikon, Sonor. Ubain sias chanzuns per chor viril ni maschadà. Giusep Sialm ha cumponì vers 100 ovras. El ha dirigì musicas da qualitad (d.a. Mustér, Cham, Birsfelden). El è stà commember da la cumissiun da musica da l'Uniun svizra da musica ed expert a festas. Tut quai sper sia occupaziun principala: magister da musica al gimnasi e manader da la scola da musica da Birsfelden. Giusep Sialm è naschì ils 7 da mars 1934 a Segnas/Mustér. El ha frequentà il gimnasi a Mustér ed il seminari da scolasts a Cuira. Lura suondan studis da magister secundar e da musica a Fribourg e studis da musica a Turitg, Vienna e Salzburg. Ils 19 da settember 1985 è Giusep Sialm mort a Therwil suenter curta e greva malsogna en la vegliadetgna da mo 51 onn.