Radund 10'000 jodladras e jodladers activs sco era sunatibas e numerus bittabandieras èn sa participads a la 31avla festa federala da jodlar a Zug. Pervi da la pandemia da corona han els stuì spetgar sis onns suenter l'ultima festa a Brig-Glis il 2017. Radund 210'000 persunas han visità la festa a Zug ed uschia procurà per ina immensa culissa d'aspectaturas ed aspectaturs.
L'Artg musical porta l'emissiun Zoogä-n-am-Boogä che l'emettur SRF-Musikwelle ha fatg ils 17 da zercladur 2023 ord il «Potzmusig-Chalet» gest a la riva dal lai da Zug. La moderatura Pia Kaeser ha pudì beneventar diversas furmaziuns da jodlar, chantar e chapellas da musica populara. Er a pled vegnan duas interpretas e la presidenta da l'Associaziun federala da jodladers, la Grischuna Karin Niederberger.
Budget da passa 5 milliuns francs
Durant trais dis èn stads d'udir e da vesair avant las giurias passa 600 producziuns da jodlar, bunamain 400 producziuns da sunatibas e 160 producziuns da bittabandieras. Quai ha carmalà in pievelun a Zug. Per pudair realisar ina festa da tala dimensiun hai duvrà passa 1'000 gidantras e gidanters e natiralmain ch'i dovra er daners. L'organisaziun ha quintà cun custs da radund 5,23 milliuns francs. Bun in terz da quai deriva da las entradas, cartas festivas e medaglias e radund 650'000 francs ord la gastronomia durant la festa. La pli gronda part, numnadamain 3,1 milliuns francs, deriva però dal sponsoring. Senza sponsurs n'èsi ozendi practicamain strusch pli pussaivel da realisar festas en tala dimensiun.
Per l'emprima giada n'han ins betg squitschà il cudesch da festa mabain edì quel en furma digitala sin la pagina uffiziala da la festa. E da las experientschas ch'ils da Zug han fatg pon en trais onns forsa era profitar ils da Basilea. En la citad al Rain è il 2026 la proxima festa federala da jodlar, la 32avla.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
