Quest onn avessan tant il cumponist Duri Sialm sco er il poet e scrivent Flurin Camathias in'anniversari radund. In bun mument per dar in sguard sin lur ovra e laschar reviver quellas. Simon Camartin e Giusep Giuanin Decurtins èn sa mess vidlonder da s'occupar cun vita ed ovra dal cumponist da Segnas sco er dal poet da Laax. Ed els dus èn sa mess a la tschertga ed er chattà intginas ivettas e schizunt ina perla, in «Ave Maria» anc nunenconuschent. En l'uniun da Mustér «La curturella» cun ses president Hans Huonder han els dus chattà in'uniun ch'è stada pronta d'organisar in concert commemorativ. En quel èn d'udir diversas chanzuns da chors enconuschentas e main enconuschentas dentant er ovras per chant solo e clavazin.
Duri Sialm (*3.7.1891 – 18.12.1961)
Ils 3 da fanadur 2021 èsi stà 130 onns dapi la naschientscha dal musicist, pedagog da musica e cumponist Duri Sialm, oriund da Segnas/Mustér e stà sesent a Cuira. Là è el mort ils 18 da december 1961. Betg mo quellas datas da vita han stimulà Camartin/Decurtins mabain en emprima lingia la qualitad da sias cumposiziuns vocalas ed instrumentalas.
Flurin Camathias (*6.3.1871 – 3.2.1946)
Ils 6 da mars 2021 èsi stà 150 onns dapi la naschientscha dal plevon, poet e scrivent Flurin Camathias, oriund da Laax. El è stà spiritual a Breil, Andiast e Siat. Mort è sur Flurin Camathias ils 3 da fanadur 1946. El vala sco in dals impurtants poets e scrivents rumantschs. Numerusas da sias poesias èn vegnidas messas en musica.
Sialm & Camathias
Sper lur lavur individuala han Duri Sialm e sur Flurin Camathias er collavurà stretgamein l'onn 1924 vid il gieu festiv per la festa centenara da la Ligia Grischa a Trun. Intginas chanzuns da quai gieu èn daventadas veritabels hits (Schi ditg che stattan cuolms e vals, stai ferma Ligia grischa u Si sededesta Rezia nossa). Sper questas chanzuns dal gieu festiv datti aunc intginas autras cumposiziuns da Duri Sialm tenor poesias da sur Flurin Camathias, chanzuns per chor viril, maschadà e per chant da solo sco er divers tocs per clavazin.
Primaudiziun «Knoten»
Cuntradas e bajetgs sacrals dattan tempra tut speziala al caracter dals umans, uschia era la cuntrada enturn Mustér cun la claustra ed in tozzel ulteriurs bajetgs sacrals. Uschia n'èsi betg da far curvien che nus chattain er en las ovras da Duri Sialm fastizs cun ina relaziun directa a la cuntrada, baselgias e cultura. Sa basond sin quest patratg ha Simon Camartin surdà l’incumbensa ad in cumponist armen, ad Ashot Zohrabyan (annada 1945) da cumponer in’ovra che descriva sin moda musicala la correlaziun tranter cuntrada e lur umans.
Simon Camartin ha tarmess al cumponist maletgs da baselgias e capluttas da Mustér e numerusas infurmaziuns davart la musica da Duri Sialm e sia persunalitad. Uschia ha Ashot Zohrabyan scrit l’ovra «Knoten» per violina e clavazin. – «Knoten» («Nuvs») èn impurtants puncts da colliaziun. La baselgia da Segnas collia il mund cun il tschiel. A Segnas è Duri Sialm naschì e battegià e là ha el gia sco uffant sunà l’orgla. La baselgia claustrala collia medemamein tschiel e terra, pertge in pader da la claustra ha mussà a Duri Sialm da sunar clavazin ed orgla.
Ils interprets
Sialm ord l'archiv da RTR
Cunquai ch'il concert a Mustér n'ha betg durà duas uras avain pudì cumplettar l'emissiun dubla cun intginas ulteriuras ivettas da Duri Sialm ord noss archiv. Tranter auter datti er chanzuns per chor d'uffants u registraziuns dal Madrigalchor Cuira u las dunnas dal Chor da concert grischun. Plinavant pudain tadlar ils chors virils Ligia Grischa, Lumnezia e Trun.
