L'emprima festa da chant en il chantun Grischun suenter la pandemia da corona ha carmalà blera glieud en la Val Müstair. Malgrà ch'il Cor viril Alpina ha stuì spetgar dus onns pli ditg sin pudair organisar la «Festa da chant» han ils umens e lur gidantras e gidanters mess en pe ina digna e bella festa districtuala. Er Son Peder ha laschà traglischar il sulegl durant tut ils dis da festa.
Ils 20 chors ord il district (16 da l'Engiadina, 2 da la Val Müstair e mintgamai in dal Puschlav e la Bregaglia) èn sa preparads bain per lur producziuns avant la giuria. La Baselgia Ospiz e la baselgia da la claustra Son Jon èn stadas las zonas da silenzi nua che la giuria (Ruth Soland, Martin Zimmermann, Retus Giger e Martin Wildhaber) han tadlà las producziuns. Er il chor organisant ha chantà avant la giuria, gist sco emprim chor en la claustra Son Jon. Er en onur da Fredy Oswald, il cumponist jauer (*1938 – †1991) ha mintga chor chantà sco emprim ina chanzun generala avant che da preschentar sias chanzuns da gara. Per lezzas ha mintga chor pudì eleger sch'el vul laschar giuditgar cun «nota» e cun discurs u be cun in discurs. Dapi la festa chantunala 2018 a Chiavenna na datti betg pli ils predicats («excellent», «fitg bun» etc.) mabain be pli notas sco en scola (6 / 5.5 / 5 / 4.5 / 4 e 3.5 ).
Ruth Soland, commembra da giuria ed oriunda da Bever, ha survegnì ina buna impressiun generala da las producziun.
Emprima festa per la presidenta dal district
Per Barbara Camichel è la festa da chant a Müstair er gist l'emprima ch'ella ha gì d'exequir sco presidenta dal district Engiadina / Val Müstair / Valle di Poschiavo / Bregaglia. Ella è dapi il 2018 presidenta ed ha gì plaschair da la festa ch'il Cor viril Alpina Val Müstair ha mess en pe.
Focus spezial sin nova generaziun
Bel è era stà da vesair ch'ils chors n'han betg dà si suenter la crisa da corona e las restricziuns da far emprova. Intgins chors han nudà ina pitschna reducziun da commembras e commembers, auters chors han collavurà (p.ex. ils chors maschadads da Puntraschigna e Samedan) e la gronda part dals chors han pudì mantegnair il dumber da chantaduras e chantadurs. Quai che manca dentant tar ils blers chors è la generaziun giuvna. E gist en quest punct han il district sco era il chor organisant dà pais. Cun il Kidsday il venderdi ha il district Engiadina / Val Müstair / Valle di Poschiavo e Bregaglia realisà in'occurrenza innovativa per purtar pli da strusch als uffants e giuvenils il chant. Sch'ils divers workshops portan fritg vegn l'avegnir a mussar. In emprim pass è en scadin cas fatg.
RTR a la Festa da chant
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.