Hugo Distler è naschì il 1908, curt avant l'emprima guerra mundiala. Refusà e bandunà da sia mamma ha el fatg tras duas guerras mundialas, las sgarschurs dal naziunalsocialissem tudestg pero er ils «Roaring Twenties» e la crisa mundiala d'economia. Sco auters cumponists da ses temp ha Hugo Distler rut si chadainas musicalas e perscrutà novs horizonts musicals.
«Die Weihnachtsgeschichte» (op. 10) da Hugo Distler è en sia finezza commuventanta in bel empruvament per mintga ensemble a cappella durant il temp d'advent e Nadal. Las set variaziuns da la chanzun «Es ist ein Ros entsprungen» che van tras l'ovra furman dapli che be la structura da l'istorgia. Il dirigent da l'ensemble vocal Cantaurora, Peter Appenzeller, è fascinà da l'ovra.
Dapli
«Johannes und Christgeburt» è in'ovra da Peter Appenzeller. El ha prendì il text «In himelriche ein hus stat» dal chantadur dal trubadur Spervogel dal 12avel tschientaner e stgaffì ordlunder quest oratori. La librettista Rose Aggeler da Mörschwil (SG) ha accumpignà stretgamain Appenzeller che di che questa collavuraziun saja stada fitg inspiranta. En l'emissiun è d'udir l'emprima part dal oratori.
