«Dubis da sasez», «chau dir», «sinfonias monumentalas»: quai è Bruckner en trais chavazzins. Era sch'il cumponist ha cumbattì durant tut sia vita cun grondas malsegirtads, è el adina restà fidaivel a sias ideas musicalas. Uschia è daventà or d’in giuven organist da la champagna in grond cumponist sinfonic. Quest svilup ha procurà per blera sceptica ma era per ina massa admiraziun.
Dad organist tar cumponist
Il bab dal cumponist è mort fitg baud ed uschia è Bruckner daventà «Sängerknabe» en la Claustra St. Florian. En quest lieu ha el scuvert sia passiun per l’orgla.
Pli tard è el stà emploià divers onns sco organist en il Dom da Linz. Là è er il cumponer daventà adina pli central. Uschia èn naschidas emprimas ovras per orgla e clavazin ed era ina massa musica vocala. Bainprest ha il giuven cumponist dentant badà che sia via musicala duess anc cuntinuar.
Suenter divers onns da scolaziun en teoria e pratica da cumponer ha Bruckner cumenzà a sa deditgar a la cumposiziun sinfonica – quai pir en la vegliadetgna da 40 onns. Il stil agen dal cumponist da la provinza che viveva da lez temp gia en la chapitala da l’Austria n’ha per in lung temp gì nagin success.
In dals motivs per l’opposiziun envers si’ovra era segir sia extrema fascinaziun per Richard Wagner. Per il public da Vienna era da lez temp la musica pli tradiziunala da Brahms l’unica endretga. La musica da Bruckner che sa drizzava vers il stil modern da Wagner n'aveva nagina valur per els.
Las ovras da Bruckner na valan nagut. En in pèr onns na discurra nagin pli da sia musica.
Malgrà la gronda critica è Bruckner restà chau dir. El ha mantegnì ses stil ed ha cumponì en tut nov sinfonias – medem bleras sco Beethoven. Lantschà reconuschientscha e success ha finalmain sia 7avla che vala er oz anc sco ina da sias ovras las pli impurtantas.
Mai maridà – savens inamurà
Davart Bruckner e l’amur datti differentas tunas. Causa ch’el para d'esser stà in uscheditg fanaticher da cifras, vegni ditg ch’el manava cudesch davart sias numerusas «mattas». D’in mument a tschel sa pudeva il cumponist inamurar e pauc pli tard era questa amur puspè sparida. Sch’ins gizza bain las ureglias, aud’ins quest muster er en sias sinfonias: l’orchester procura per tensiun da tornado e suenter l’explosiun abrupta segua ina calma. Pauc pli tard cumenza tut puspè da nov: ina nova «matta» s’avischina.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
