cuntegn

Artg musical Beneventain il 2025 cun marschs!

Musicas instrumentalas, orchesters sinfonics, chapellas popularas ed era ina u l’autra furmaziun da surpraisa salidan l’onn nov cun ina vasta paletta da marschs.

Autor: Braida Janett

30.12.2024, 13:09

In marsch n’è betg simplamain in marsch. Tut tenor da tge epoca ch’el deriva u tge furmaziun ch’interpretescha el, po el esser da fitg differenta tempra. Cun dar in’invista en la gronda variaziun da quest gener da cumposiziun dat l’Artg musical il bainvegni al 2025. Cumposiziuns sco «Stars and Stripes forever» da l'uschenumnà retg da la musica da marsch, John Philip Sousa, il «Radetzky-Marsch» da Johann Strauss il bab, u l’enconuschent «Florentiner-Marsch» da Julius Fucik, interpretà d’ina furmaziun dal tuttafatg speziala, procuran per in’ura da musica festiva per lantschar l’onn nov.

Scriver musica sa mintgin! Tutgar il cor dal public è dentant in'autra chaussa.

Autur: John Philip Sousa cumponist

Rataplan da tambur - quatter tacts introducziun - melodias che tschiffan in e scadin: quai è l'enconuschent marsch da Johann Strauss (bab) en trais chavazzins.

In concert da Bumaun dals «Wiener Philharmoniker» senza il «Radetzky» na datti betg. Quest marsch è dapi onns il terz supplement dal renumà concert che vegn emess mintg'onn il 1. da schaner en bunamain 90 pajais. Il splatschar dal public durant il toc è bunamain daventà part da la cumposiziun. Insatge ch'è normalmain in tabu en il mund da concerts classics è tar quest toc tradiziun.