Ils 31 da december 1939 han ils Wiener Philharmoniker dà per l'emprima giada in concert per la midada da l'onn, quai è stà il cumenzament dals concerts da Bumaun ch'i dat dapi lura.
Gia ils onns 1929 fin 1933 aveva Clemens Krauss dirigì a chaschun dals Salzburger Festspiele concerts cun musica exclusiva da la dinastia Strauss, pia musica dal bab Johann e da ses figls Johann, Josef ed Eduard. Da cuntinuar cun quai era en la chapitala austriaca Vienna era ord vista artistica, ina consequenza logica.
La dinastia Strauss ha pregnà fitg la musica en l'Austria, en spezial era cun lur cumposiziuns da valsers, polcas, marschs e galops. Il bab Johann ha era fundà ses agen orchester «Strauss-Capelle» che ses figl Eduard ha dirigì passa 30 onns e che ha era schlià el il 1901. Bab e tuts trais figls eran cumponists ordvart dilligents, il pli enconuschent è bain il figl Johann, il «Walzerkönig». Lez ha scrit las pli bleras ovras. Sper passa 500 valsers, polcas, marschs e quadrillas ha el er cumponì 15 operettas ed in'opera.
Adina puspè vegnan sunadas ovras dad els, era en ils concerts da Bumaun. Aschia steva il concert da Bumaun dal 2004 (che vegn emess en l'Artg musical) sut il motto «Johann Strauss Vater und seine Söhne». La raschun per quest motto: Ils 14 da mars 2004 avess Johann Strauss bab pudì festivar ses 200avel natalizi.
Il dirigent Ricardo Muti ha elegì per il concert 2004 musica quasi exclusiva da la famiglia Strauss. El ha schizunt tschernì cumposiziuns che n'èn anc maina vegnidas sunadas ad in concert da Bumaun fin lura. Uschia per exempel la «Federica-Polka» ed il «Philomelen-Walzer». Sper intginas ovras da la dinastia Strauss datti er ina cumposiziun da Joseph Lanner, lez era in bun ami da Johann Strauss bab.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.