La band è vegnida fundada a posta per il festival Wallberg (hotel e chasa da cultura) a Volketswil ZH. Inizant era lura Hanspeter Adank. Dapi lura exista la brass band d'excellenta qualitad. Suenter il festival Wallberg n'han las musicantas ed ils musicants betg vulì laschar esser quai ina chaussa unica ed han decidì da cuntinuar.
Quest onn èsi gia 20 onns che musicantas e musicants da la Svizra Orientala, (per part era da l'ulteriura Svizra) sco era solistas e solists da l'entira Europa s'inscuntran mintg'onn durant in'emna il settember a Sursaissa.
Durant paucs dis exerciteschan els ils tocs per in concert ed en emprima lingia per sa participar a la concurrenza da Brass Bands Swiss Open a Lucerna. In dals commembers ed era suprastant da la Wallberg Band è Gian Carlo Caviezel. El suna dapi l'entschatta en questa band ed è anc adina motivà da cuntinuar e porscher a giuvens talents motivads ina brass band d'emprima qualitad en la Svizra Orientala.
Per il giubileum da 20 onns ha la Wallberg Band dà quest onn dus concerts. In en il Titthof a Cuira ed in a Volketswil, là nua che la band ha festivà sia premiera. Il concert dal Titthof ha RTR registrà e quel pudais tadlar en l'Artg musical.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.